Maval Pre Monsoon Work – मृग नक्षत्राच्या मुहूर्तावर येणाऱ्या पावसाची चाहूल लागताच पवन मावळ परिसरातील ग्रामीण भागात मान्सूनपूर्व शेतीकामांना वेग आला आहे. गेल्या काही दिवसांपासून उन्हाचा चटका काहीसा कमी झाला आहे. संभाव्य पावसाचा अंदाज घेत बळीराजा आता शेतीच्या पूर्वतयारीत पूर्णपणे व्यस्त झाला असून शेतशिवारात नांगरणी, कोळपणी आणि मशागतीची लगबग सुरू झाली आहे.

मावळ तालुक्याचा पश्चिम भाग हा प्रामुख्याने पावसावर आधारित शेतीसाठी ओळखला जातो. विशेषतः भात शेती हा येथील प्रमुख व्यवसाय असून खरीप हंगाम शेतकऱ्यांसाठी अत्यंत महत्त्वाचा मानला जातो. त्यामुळे मृग नक्षत्र सुरू होण्यापूर्वीच शेतकरी पावसाच्या आगमनाची तयारी करताना दिसत आहेत. यंदा पाऊस वेळेत आणि चांगला होईल, अशी आशा शेतकऱ्यांमध्ये व्यक्त होत असून त्यानुसार शेतातील कामांना वेग देण्यात आला आहे.

सध्या पवन मावळ परिसरातील अनेक गावांमध्ये पारंपरिक तसेच आधुनिक पद्धतीने शेतीची मशागत सुरू आहे. काही ठिकाणी बैलांच्या जोड्यांच्या सहाय्याने पारंपरिक पद्धतीने नांगरणी केली जात असून ग्रामीण भागात अजूनही पारंपरिक शेती संस्कृतीचे दर्शन घडत आहे. तर दुसरीकडे आधुनिक तंत्रज्ञानाचा वापर करत अनेक शेतकरी ट्रॅक्टरच्या सहाय्याने जमिनी भुसभुशीत करण्याचे काम करत आहेत.

त्यामुळे शेतशिवारात सकाळपासून संध्याकाळपर्यंत शेतीकामांची लगबग पाहायला मिळत आहे. गेल्या काही वर्षांमध्ये बदलत्या हवामानामुळे शेतकऱ्यांना अनेक अडचणींचा सामना करावा लागला आहे. कधी अतिवृष्टी तर कधी पावसाचा पडलेला खंड यामुळे पिकांचे मोठे नुकसान झाले होते. त्यामुळे यंदा पाऊस वेळेवर आणि समाधानकारक होण्याची अपेक्षा शेतकरी व्यक्त करत आहेत.

दरम्यान, परिसरात सध्या ढगाळ वातावरण निर्माण होत असल्याने शेतकऱ्यांची धावपळ आणखी वाढली आहे. अनेक शेतकरी सकाळपासून उशिरापर्यंत शेतात राबताना दिसत आहेत. शेतीसाठी आवश्यक असलेल्या उपकरणांची दुरुस्ती आणि मशिनरीची तयारीही सुरू झाली आहे.