Maval News – महाराष्ट्र राज्याचे उपमुख्यमंत्री अजितदादा पवार आणि मावळ विधानसभेच्या पहिल्या महिला आमदार श्रीमती रूपलेखाताई ढोरे तसेच कार्ला गावातील सामाजिक कार्यकर्ते शांताराम सोंडेकर या तिन्ही दिवंगत मान्यवरांना ग्रामस्थांच्या वतीने श्रद्धांजली अर्पण करण्यात आली. अजितदादा पवार आणि रुपलेखाताई ढोरे या दिग्गज नेत्यांच्या निधनामुळे संपूर्ण मावळ तालुक्यावर शोककळा पसरली आहे. एकाच वेळी राज्याचे आणि तालुक्याचे नेतृत्व अचानकपणे हरपल्याने मावळवासीयांना मोठा धक्का बसला आहे. मावळ तालुक्यातील शहरासह प्रत्येक गावात संध्याकाळी सात वाजता शोकसभांचे आयोजन करण्यात आले. त्यासोबतच कार्ला गावात देखील या शोकसभेचे आयोजन करण्यात आले होते. शोकसभेत कार्ला ग्रामस्थांसह सर्वपक्षीय कार्यकर्ते, लोकप्रतिनिधी, संघटनाचे आणि विविध संस्थांचे पदाधिकारी देखील यावेळी उपस्थित होते. या शोकसभेत उपस्थितांनी अजितदादांच्या आणि रूपलेखाताईंच्या आठवणींना उजाळा दिला.
