Masterchef Vaibhav Sooryavanshi shows off his culinary skills : क्रिकेटच्या मैदानात आपल्या फलंदाजीने भल्याभल्या गोलंदाजांच्या मनात धडकी भरवणारा १५ वर्षांचा युवा खेळाडू वैभव सूर्यवंशी सध्या एका वेगळ्याच कारणाने चर्चेत आला आहे. मैदानात जितका आक्रमक, तितकाच वैयक्तिक आयुष्यात लाजाळू आणि मिश्किल असलेल्या वैभवचा एक खास व्हिडीओ समोर आला आहे. ज्यामध्ये तो बॅट सोडून चक्क लाटणं हातात धरून ‘मास्टरशेफ’ बनण्याचा प्रयत्न करताना दिसत आहे. किचनमध्ये वैभवचा ‘पांडा’ अवतार – राजस्थान रॉयल्सने आपल्या अधिकृत सोशल मीडिया हँडलवरून वैभव सूर्यवंशीचा एक गोंडस व्हिडीओ शेअर केला आहे. व्हिडिओची सुरुवातच वैभवच्या ‘मास्टरशेफ वैभव’ या संवादाने होते. किचनमध्ये काय मदत करू शकतो, असे विचारल्यावर वैभव अत्यंत निरागसपणे सांगतो की, “मी फक्त रोट्या बनवू शकतो, त्यापेक्षा जास्त काही मला येत नाही.” त्यानंतर तो एक रोटी लाटून आणतो आणि आपल्या कल्पकतेने त्या पिठाला दोन छोटे कान काढून त्याला चक्क ‘पांडा’चा आकार देतो. मम्मीपेक्षाही गोल रोटी! 𝘔𝘶𝘮𝘮𝘺 𝘬𝘦 𝘳𝘰𝘵𝘪 𝘴𝘦 𝘻𝘺𝘢𝘥𝘢 𝘨𝘰𝘭 𝘳𝘰𝘵𝘪 𝘩𝘢𝘪 😂💗 pic.twitter.com/qOqthFPWXU — Rajasthan Royals (@rajasthanroyals) May 12, 2026 रोटी भाजताना वैभवचा स्वॅग पाहण्यासारखा आहे. डोळ्यावर काळा चष्मा लावून पूर्ण स्टाईलमध्ये तो रोटी भाजण्याचा प्रयत्न करतो. एखादा प्रोफेशनल शेफ ज्याप्रमाणे हवेत उलटवून पदार्थ परततो, तसा प्रयत्न वैभव करतो, पण त्यात तो सपशेल अपयशी ठरतो. यावेळी त्याच्या चेहऱ्यावरचे भाव चाहत्यांना खळखळून हसवणारे आहेत. त्यानंतर दुसरी रोटी लाटल्यावर तिची गोलाई पाहून वैभवचा आनंद गगनात मावेनासा होतो. तो आनंदाने ओरडून म्हणतो, “ही तर मम्मीच्या रोटीपेक्षाही जास्त गोल आहे!” हेही वाचा – Who is Madhav Tiwari : कोण आहे हा माधव तिवारी? दिल्लीचा ‘गुपित हिरा’ ज्याने शेवटच्या ८ चेंडूत पंजाबच्या जबड्यातून विजय हिसकावला! ३ रोट्यांचा यशस्वी प्रयोग – व्हिडिओमध्ये वैभव एकामागून एक तीन रोट्या तयार करतो. स्वतःच्या कामाचे कौतुक करताना तो म्हणतो की, “बाकीच्यांपेक्षा माझे काम खूप चांगले सुरू आहे.” तिसरी रोटी तयार झाल्यावर जेव्हा कोणीतरी ती घेऊन जाते, तेव्हा तो लहान मुलांसारखी तक्रारही करतो. मैदानावरील खूंखार फलंदाज आणि घरातला हा निरागस मुलगा, वैभवचे हे दोन्ही रूप पाहून क्रिकेट चाहते त्याच्या प्रेमात पडले आहेत.
