Market This Week: भारतीय शेअर बाजारात शुक्रवारी मोठी पडझड झाली. निफ्टी-५० निर्देशांक १.२५ टक्क्यांनी घसरून २५,१७८ वर, तर सेन्सेक्स १.१७ टक्क्यांनी कोसळून ८१,२८७ वर बंद झाला. आर्थिक क्षेत्रातील म्हणजेच बँका आणि वित्तीय कंपन्यांच्या शेअर्समध्ये १.६ टक्क्यांची घसरण झाल्याने बाजारावरील दबाव आणखी वाढला. फेब्रुवारी महिना आयटीसाठी सर्वात वाईट – फेब्रुवारी महिन्याचा विचार करता निफ्टी ०.६ टक्के, तर सेन्सेक्स १.२ टक्क्यांनी खाली आला. हे सलग तिसऱ्या महिन्यातील नुकसान आहे. मात्र सर्वाधिक फटका आयटी क्षेत्राला बसला. आयटी निर्देशांक फेब्रुवारीत तब्बल १९.५ टक्क्यांनी कोसळला. हे सप्टेंबर २००८ नंतरचे म्हणजेच जागतिक आर्थिक संकटानंतरचे सर्वात मोठे मासिक नुकसान आहे. या एकाच महिन्यात आयटी क्षेत्रातील दहा प्रमुख कंपन्यांचे बाजारमूल्य तब्बल ६२.८ अब्ज डॉलर्सनी घटले. हेही वाचा – शेअर बाजारात ‘ब्लॅक फ्रायडे’; सेन्सेक्स 961 अंकांनी कोसळला, 5 लाख कोटी बुडाले, जाणून घ्या 5 प्रमुख कारणे आयटी घसरणीमागे ‘एआय’चे सावट – अमेरिकेतील अँथ्रोपिक आणि पॅलेंटिर यासारख्या कंपन्यांनी कृत्रिम बुद्धिमत्तेवर म्हणजेच ‘एआय’वर आधारित स्वयंचलित साधनांच्या घोषणा केल्या. यामुळे भारतीय आयटी कंपन्यांच्या उत्पन्नावर परिणाम होण्याची भीती गुंतवणूकदारांमध्ये निर्माण झाली आणि मोठ्या प्रमाणात विक्री सुरू झाली. भारताने युरोपीय महासंघाशी महत्त्वाचा व्यापार करार केला आणि अमेरिकेशीही प्राथमिक व्यापार करार झाला, तसेच कंपन्यांचे तिमाही निकाल चांगले असतानाही आयटी क्षेत्रातील या विक्रीच्या लाटेने सकारात्मक बातम्यांना झाकोळून टाकले. जिओजित इन्व्हेस्टमेंट्सचे संशोधन प्रमुख विनोद नायर म्हणाले, “घसरणीनंतर आयटी शेअर्समध्ये काही प्रमाणात खरेदी दिसत आहे, मात्र एकूण कल अद्यापही कमकुवत आहे. परदेशी गुंतवणूकदार सावध असून बाजारातील चढउतार पुन्हा वाढू शकतात.” हेही वाचा : माजी मुख्यमंत्री पनीरसेल्वम यांचा द्रमुकमध्ये प्रवेश; विधानसभा अध्यक्षपदाचे दिले आश्वासन आयटी वगळता इतर क्षेत्रे मात्र वरच्या दिशेने – आयटी वगळता इतर १५ पैकी १४ प्रमुख क्षेत्रांनी फेब्रुवारी महिन्यात वाढ नोंदवली. मिडकॅप निर्देशांक १.२ टक्के, तर स्मॉलकॅप निर्देशांक ०.३ टक्क्यांनी वधारला. सरकारी बँकांच्या शेअर्समध्ये ८.९ टक्क्यांची मोठी तेजी आली. यात एसबीआय आघाडीवर राहिला. एसबीआयने ११.६ टक्क्यांची झेप घेत मार्च २०२५ नंतरचा सर्वोत्तम मासिक परतावा दिला. ग्राहकोपयोगी वस्तूंच्या क्षेत्राने ९.३ टक्क्यांची उसळी घेतली कारण सरकारच्या करकपातीमुळे मागणी वाढण्याची आशा बळावली. कंपन्यांचे निकाल चांगले, गुंतवणूकदारांचे लक्ष जीडीपी आकड्यांकडे – निफ्टी-५० मधील कंपन्यांनी डिसेंबर तिमाहीत वार्षिक आधारावर ७.५ टक्के नफावाढ नोंदवली, तर बीएसई-५०० मधील कंपन्यांचा नफा १६ टक्क्यांनी वाढला. फेब्रुवारी महिन्यात अपोलो हॉस्पिटल्स १२.४ टक्के, अदानी एंटरप्राइजेस ७ टक्के आणि आयशर मोटर्स १२.५ टक्क्यांनी वधारले. आता गुंतवणूकदारांचे लक्ष डिसेंबर तिमाहीच्या जीडीपी आकड्यांकडे लागले असून हे आकडे नव्या पद्धतीने म्हणजेच आधार वर्ष २०११-१२ ऐवजी २०२२-२३ नुसार जाहीर होणार आहेत.