Mark Carney on Donald Trump । कॅनडाच्या पंतप्रधानपदी मार्क कार्नी यांची वर्णी लागली आहे. ते जस्टिन ट्रुडो यांची जागा घेतील. अमेरिकेचे अध्यक्ष डोनाल्ड ट्रम्प यांनी ओटावाविरुद्ध व्यापार युद्ध सुरू केले आहे, अशा वेळी कार्नी देशाचा कार्यभार स्वीकारतील. रविवारी झालेल्या लिबरल पक्षाच्या नेतृत्वाच्या निवडणुकीत कॅनडाच्या मध्यवर्ती बँकेचे आणि बँक ऑफ इंग्लंडचे माजी गव्हर्नर यांनी तीन प्रतिस्पर्ध्यांचा मोठ्या मताधिक्याने पराभव केला. कार्नी यांनी कधीही कोणतेही निवडून आलेले पद भूषवलेले नाही. कार्नी येत्या काही दिवसांत पंतप्रधान म्हणून शपथ घेतील आणि पुढील सार्वत्रिक निवडणुकीत लिबरल पक्षाचे नेतृत्व करतील. ट्रम्पवर हल्ला Mark Carney on Donald Trump । समोर आलेल्या माध्यमातील अहवालानुसार, ५९ वर्षीय कार्नी यांनी त्यांच्या विजय भाषणाचा बहुतांश भाग ट्रम्पवर हल्ला करण्यात घालवला. ते म्हणाले, “अमेरिकन लोकांनी कोणताही गैरसमज बाळगू नये. हॉकीप्रमाणेच व्यवसायामध्येही कॅनडा जिंकेल.” असा विषावस यावेळी त्यांनी व्यक्त केला. अमेरिकन राष्ट्राध्यक्ष बऱ्याच काळापासून कॅनडावर हल्ला करत आहेत. त्यांनी अनेक वेळा कॅनडा हे अमेरिकेतील ५१ वे राज्य आणि त्याचे पंतप्रधान हे राज्यपाल असल्याचे वर्णन केले आहे. ट्रम्पने ओटावाला आपल्या इच्छेनुसार वळवण्याचा प्रयत्न करण्यासाठी कॅनेडियन आयातीवर २५ शुल्क लादले, नंतर त्यांनी त्यापैकी काही शुल्क स्थगित केले. कॅनडानेही प्रत्युत्तरात्मक शुल्क लादले. ट्रुडो यांनी त्यांच्या अमेरिकन समकक्षांवर देशाची अर्थव्यवस्था उद्ध्वस्त करण्याचा प्रयत्न केल्याचा आरोप केला. आपल्या विजयी भाषणात कार्नी म्हणाले की,”ट्रम्प कॅनेडियन कामगार, कुटुंबे आणि व्यवसायांवर हल्ला करत आहेत.” “आम्ही त्यांना यशस्वी होऊ देऊ शकत नाही,” असे ते म्हणाले. कार्नी म्हणाले की त्यांचे सरकार “जोपर्यंत अमेरिकन आमचा आदर करत नाहीत तोपर्यंत” अमेरिकन आयातीवरील कर सुरू ठेवेल. कॅनडा कधीही अमेरिकेचा भाग होणार नाही Mark Carney on Donald Trump । कॅनडा हे अमेरिकेचे ५१ वे राज्य होईल या ट्रम्पच्या दाव्याला उत्तर देताना कार्नी म्हणाले, “कॅनडा कधीही, कोणत्याही प्रकारे, अमेरिकेचा भाग राहणार नाही.” “अमेरिकन लोकांना आमची संसाधने, आमचे पाणी, आमची जमीन, आमचा देश हवा आहे,” ते म्हणाले .पुढे बोलताना ते म्हणाले, “हे काळे दिवस आहेत, ज्या देशावर आपण आता विश्वास ठेवू शकत नाही अशा देशाने लादलेले काळे दिवस.” जानेवारीमध्ये ट्रुडो यांनी जवळजवळ एक दशक पदावर राहिल्यानंतर राजीनामा दिला तेव्हा लिबरल नेतृत्वाची शर्यत सुरू झाली. मतदारांमध्ये त्यांची तीव्र अलोकप्रियता असल्याने, त्यांच्यावर पद सोडण्यासाठी प्रचंड दबाव होता. घरांच्या संकटामुळे आणि राहणीमानाच्या वाढत्या खर्चामुळे लोक निराश झाले होते. रविवारी त्यांच्या लिबरल पक्षाला निरोप देताना ट्रुडो यांनी इशारा दिला की कॅनडाला अमेरिकेकडून अस्तित्वाचे आव्हान आणि आर्थिक संकटाचा सामना करावा लागत आहे.
