Marco Jansen’s record of sixes : गुवाहाटीच्या बरसापारा क्रिकेट स्टेडियमवर सुरू असलेल्या दुसऱ्या कसोटी सामन्यात दक्षिण आफ्रिकेने भारतासमोर पहिल्या डावात ४८९ धावांचा विशाल स्कोर उभा केला आहे. आफ्रिकेच्या तळाच्या फलंदाजांनी भारतीय गोलंदाजांचा कस पाहिला, ज्यामध्ये सेनुरन मुथुसामी आणि मार्को यान्सन यांनी निर्णायक भूमिका बजावली. यासह यान्सनने भारताविरुद्ध एक खास पराक्रमही केला. मुथुसामीचे संयमी शतक आणि यान्सनची फटकेबाजी दक्षिण आफ्रिकेला मोठ्या धावसंख्येपर्यंत पोहोचवण्यात अष्टपैलू सेनुरन मुथुसामी याचे योगदान मोलाचे ठरले. मुथुसामीने २०६ चेंडूंचा सामना करत १० चौकार आणि २ षटकारांच्या मदतीने १०९ धावांची खेळी केली आणि आपल्या कसोटी कारकिर्दीतील पहिले शतक झळकावले. दुसरीकडे, मार्को यान्सनचे शतक अवघ्या ७ धावांनी हुकले. त्याने ९१ चेंडूत ९३ धावांची आक्रमक खेळी केली. यान्सनने साधली डिव्हिलियर्स-डी कॉकच्या विक्रमाशी बरोबरी मार्को यान्सनने आपल्या खेळीत भारतीय गोलंदाजांवर हल्लाबोल करत तब्बल ७ उत्तुंग षटकार लगावले. यासह त्याने दक्षिण आफ्रिकेसाठी एका डावात सर्वाधिक षटकार मारण्याच्या डिव्हिलियर्स आणि डी कॉकच्या विक्रमाशी बरोबरी केली आहे. यापूर्वी हा विक्रम एबी डिव्हिलियर्स (२००९, विरुद्ध ऑस्ट्रेलिया) आणि क्विंटन डी कॉक (२०२१, विरुद्ध वेस्ट इंडिज) यांच्या नावावर होता. आता यान्सन या खास ‘क्लब’मध्ये सामील होणारा तिसरा आफ्रिकन फलंदाज ठरला आहे. हेही वाचा – Smriti Mandhana : स्मृतीच्या वडिलांची प्रकृती आता कशी आहे? डॉक्टरांनी दिली माहिती; म्हणाले, ‘सतत ईसीजी मॉनिटरिंग…’ दक्षिण आफ्रिकेसाठी एका कसोटी डावात सर्वाधिक षटकार मारणारे फलंदाज: ७ – एबी डिव्हिलियर्स विरुद्ध ऑस्ट्रेलिया, केपटाऊन, २००९ ७ – क्विंटन डी कॉक विरुद्ध वेस्ट इंडिज, ग्रोस आयलेट, २०२१ ७ – मार्को यान्सन विरुद्ध भारत, गुवाहाटी, २०२५ भारतीय गोलंदाजांचे प्रयत्न आणि तळाच्या फळीचा प्रतिकार सामन्याच्या सुरुवातीला एडेन मारक्रम आणि रायन रिकेलटन यांनी ८२ धावांची सलामी दिली. मधल्या सत्रात भारताने काही महत्त्वाचे विकेट्स मिळवले, परंतु तळातील फलंदाज भारतासाठी डोकेदुखी ठरले. मुथुसामीने काइल वेरेनसोबत ८८ आणि नंतर यान्सनसोबत आठव्या विकेटसाठी ९७ धावांची भागीदारी करत संघाला ४०० चा टप्पा ओलांडून दिला. भारताकडून फिरकीपटू कुलदीप यादवने सर्वाधिक ४ विकेट्स घेतल्या, तर रवींद्र जडेजा, जसप्रीत बुमराह आणि मोहम्मद सिराज यांनी प्रत्येकी २-२ विकेट्स मिळवत आफ्रिकेचा डाव संपुष्टात आणला.
