Satvya Mulichi Satavi Mulgi: ‘सातव्या मुलीची सातवी मुलगी’ या लोकप्रिय मालिकेने काही दिवसांपूर्वीच प्रेक्षकांचा निरोप घेतला होता. झी मराठीवरील ही मालिका दोन वर्षांपासून प्रेक्षकांचे मनोरंजन करत होती. टीआरपीच्या शर्यतीमध्ये देखील ही मालिका आघाडीवर होती. मात्र, नवीन मालिकांमुळे ‘सातव्या मुलीची सातवी मुलगी’ला ऑफ एअर करण्याचा निर्णय घेण्यात आला.

आता ही मालिका पुन्हा एकदा चर्चेत आली आहे. यामागचे कारण म्हणजे मालिका पुन्हा एकदा प्रेक्षकांच्या भेटीला येणार आहे. तितिक्षा तावडे, ऐश्वर्या नारकर, अजिंक्य ननावरे या कलाकारांची प्रमुख भूमिका असलेली ही मालिका आता प्रेक्षकांना नवीन चॅनेलवर पाहता येणार आहे. एकीकडे जुने चित्रपट पुन्हा रिलीज होत असताना आता प्रेक्षकांना ही लोकप्रिय मालिका देखील पुन्हा एकदा नवीन चॅनेलवर पाहण्याची संधी मिळणार आहे.

‘सातव्या मुलीची सातवी मुलगी’ मालिका ‘झी चित्रमंदिर’ या चॅनेलवर पुन्हा प्रदर्शित केली जाणार आहे. 17 फेब्रुवारीपासून मालिका प्रेक्षकांना पाहण्यासाठी उपलब्ध होईल, असे सांगितले जात आहे.

दरम्यान, ‘सातव्या मुलीची सातवी मुलगी’ मालिकेने दोन वर्ष प्रेक्षकांच्या मनावर राज्य केले. 2022 ला सुरू झालेली ही मालिका 21 डिसेंबर 2024 ला ऑफ एअर झाली होती. मालिकेच्या कथानकाने प्रेक्षकांना खिळवून ठेवले होते. यामध्ये तितिक्षा तावडे, ऐश्वर्या नारकर, अजिंक्य ननावरे यांसह मुग्धा गोडबोले, रजनी वेलणकर, अजिंक्य जोशी, जयंत घाटे, राहुल मेहेंदळे, अश्विनी मुकादम या कलाकारांनीही महत्त्वाची भूमिका साकारली आहे.