Manoj Jarange : मराठा आंदोलक मनोज जरांगे (Manoj Jarange) यांनी 20 ऑक्टोबर रोजी दसरा मेळाव्यामध्ये शिवसेनेचे खासदार श्रीकांत शिंदेंच्या हस्ते भाजपकडून 500 कोटी घेऊन त्यांना दिल्याचा खळबळजनक दावा केला होता. यानंतर त्‍यांनी यासंदर्भात एक ऑडिओ क्लिपदेखील समोर आणली.

त्यानंतर भाजप आणि शिवसेनेच्या नेत्यांमध्ये आरोप-प्रत्यारोपांच्या फैरी सुरू झाल्या आहेत. तसेच विरोधकांनीदेखील सत्ताधाऱ्यांना घेरले आहे. दरम्यान, 500 कोटींच्या कथित ऑडिओ क्लिपप्रकरणी आता एसआयटी स्थापन (Manoj Jarange) करण्‍यात आली आहे.

मनोज जरांगे यांनी 500 कोटींचा उल्लेख असलेल्या ऑडिओ क्लिपची सत्यता पडताळून पाहावी आणि संपूर्ण प्रकरणाची निष्पक्ष चौकशी करावी, अशी मागणी केली होती. याचपार्श्वभूमीवर मुख्यमंत्री देवेंद्र फडणवीस यांनी मुंबई पोलीस आयुक्तांना ऑडिओ क्लिपच्या तपासाबाबत निर्देश दिले आहेत.

500 कोटींच्या कथित ऑडिओ क्लिपचा त्रिसदस्यीय समिती तपास करणार आहे. अपर पोलीस आयुक्त शैलेश बलकवडेंच्या अध्यक्षतेखाली एसआयटी स्थापन करण्यात आली आहे. या समितीत शैलेश बलकवडे यांच्यासह पोलीस उपायुक्त विजयकांत सागर आणि बजरंग बनसोडे यांचा समावेश आहे.

500 कोटींच्या कथित ऑडिओ क्लिपप्रकरणी एसआयटी स्थापन झाल्यामुळे आता या कथित ऑडिओ क्लिपचा (Manoj Jarange) स्रोत, त्यातील संभाषणाची सत्यता आणि 500 कोटी रुपयांच्या उल्लेखामागील नेमकी पार्श्वभूमी काय? यांची तपासणी होऊ शकते.