प्रभात वृत्तसेवा मंचर – मंचर नगरपंचायत निवडणुकीचा प्रचार जोरात सुरू असताना पक्षीय उमेदवारांना चिन्ह मिळाल्याने त्यांनी प्रचाराला वेग दिला आहे. अपक्ष उमेदवारांना बुधवारी (दि. 26) चिन्ह मिळणार असल्याने त्यांना प्रचारासाठी चिन्ह घरोघरी पोहचवण्यासाठी कसरत करावी लागणार आहे.नगराध्यक्ष पदासह नगरसेवक पदासाठी विविध पक्षांचे उमेदवार मतदान होण्यासाठी आपापला गड मजबूत करण्यासाठी घराघरात जाऊन मतदारांना भेटू लागले आहेत. चिन्ह मिळाल्याने त्यांना मतदारांशी संवाद साधताना सोपी ओळख निर्माण होत असून प्रचार साहित्य वाटतानाही सुविधा मिळत आहे; मात्र अपक्ष उमेदवारांची मात्र खरी धावपळ आता सुरू झाली आहे. नगराध्यक्ष पदासाठी अपक्ष म्हणून उभे असलेल्या इच्छुकांना अद्याप अधिकृत चिन्ह नसल्यामुळे त्यांना प्रचारात अडचणी निर्माण होत आहेत. मतदारांपर्यंत स्वतःची ओळख पोहोचवताना त्यांना शब्ददौड करावी लागत आहे. बुधवारी (दि. 26) चिन्ह वाटपाची प्रक्रिया पार पडणार असल्याने अपक्ष उमेदवारांना त्या दिवसाची उत्सुकतेने प्रतीक्षा आहे. चिन्ह मिळाल्यानंतर अल्पावधीतच ते चिन्ह मतदारांच्या मनात आणि घराघरात पोहोचवण्यासाठी मोठी कसरत करावी लागणार आहे. प्रचारासाठी लागणारे बॅनर, पोस्टर, हँडबील तयार करणे, कार्यकर्त्यांची बैठक घेणे आणि मतदान विभागानुसार नियोजन करणे या सगळ्या कामांसाठी आता त्यांना वेगाने धावावे लागणार आहे. त्यामुळे अपक्ष उमेदवारांचा पुढील काही दिवसांचा प्रचार अधिकच तुफानी राहणार आहे.
