Mallikarjun Kharge : देशातील सर्व निवडणुका अवैध आहेत. अवैध निवडणुकांच्या माध्यमातून आज देश चालवला जात आहे. केंद्र सरकारचे नेतृत्व करणारे नरेंद्र मोदी अवैध पंतप्रधान आहेत. केंद्रीय गृहमंत्री अमित शहा आणि सर्व मुख्यमंत्रीही अवैध आहेत, अशी आक्रमक भूमिका कॉंग्रेसचे अध्यक्ष मल्लिकार्जुन खर्गे (Mallikarjun Kharge) यांनी शनिवारी मांडली. लोकसभा आणि राज्यांच्या विधानसभा बरखास्त केल्या जाव्यात. तसेच, मतपत्रिकांच्या आधारे नव्याने निवडणुका घेण्यात याव्यात, अशी आग्रही मागणीही त्यांनी केली.

निवडणुकांवेळी गैरप्रकार घडत असल्याचे आरोप विरोधक सातत्याने करत आहेत. त्यांच्याकडून इलेक्ट्रॉनिक मतदान यंत्रांच्या (इव्हीएम) विश्‍वासार्हतेवर प्रश्‍नचिन्ह उपस्थित केले जात आहे. आता मतदारयाद्यांच्या पडताळणी (एसआयआर) वरून मोठे वादळ घोंघावत आहे. त्या पार्श्‍वभूमीवर, कर्नाटकच्या कलबुर्गीमध्ये पत्रकारांशी बोलताना खर्गे (Mallikarjun Kharge) यांनी रोखठोक भाष्य केले. इव्हीएमचा गैरवापर होत आहे.

एसआयआरमध्ये अनेक अनियमितता आहेत. एसआयआरमुळे लोकशाही कमजोर होत आहे. त्या प्रक्रियेविरोधात देशभर विरोधक आंदोलनांचे सत्र चालू ठेवतील, असा इशारा त्यांनी दिला. देशासाठी एसआयआर अयोग्य असल्याविषयी विरोधकांमध्ये एकमत आहे. त्या प्रक्रियेचा प्रतिकूल परिणाम गरीब, अशिक्षित, कामगार आणि विशेषत: अल्पसंख्याकांवर होत आहे. एका मतदान केंद्रावरून ५०० मतं हटवली गेल्यास निवडणूक निष्पक्ष, मुक्त कशी ठरेल, असा सवाल खर्गे यांनी केला.

मोदी लोकशाही उद्धवस्त करू पाहत आहेत. याआधी तशी कृती पं.जवाहरलाल नेहरू, लाल बहादूर शास्त्री, इंदिरा गांधी, राजीव गांधी, नरसिंह राव आणि इतर कुठल्याच पंतप्रधानांनी केली नाही, असे खर्गे म्हणाले. कॉंग्रेसकडून कुठली कायदेशीर पाऊले उचलली जातील का, असा प्रश्‍न पत्रकारांनी विचारला. त्यावर खर्गे उत्तरले, कायदा सत्ताधाऱ्यांच्या हातात आहे.

निवडणूक आयोग, मुख्य निवडणूक आयुक्तही त्यांच्या हाती आहेत. मशिन त्यांच्याकडून ऑपरेट केले जाते. कायदेशीररित्या आम्ही काय करू शकतो, असा प्रतिसवाल त्यांनी केला. तसेच, प्रथम मोदी आणि शहांनी लोकशाहीतून बाहेर जायला हवे, अशी पुस्तीही त्यांनी (Mallikarjun Kharge) जोडली.