Maharashtra Politics : राज्याच्या राजकारणात दोन्ही राष्ट्रवादी काँग्रेस पक्षांच्या विलीनीकरणाच्या चर्चांनी जोर धरला असतानाच आता आणखी एका मोठ्या दाव्याने राजकीय वर्तुळात खळबळ उडाली आहे. राष्ट्रवादी काँग्रेस पक्षातील २० ते २२ आमदार पक्षाला सोडचिठ्ठी देणार असल्याचा दावा ठाकरे गटाचे खासदार संजय राऊत यांनी केला आहे. विशेष म्हणजे, हे आमदार उपमुख्यमंत्री सुनेत्रा पवार यांच्या गटातून बाहेर पडून शरद पवार यांच्या नेतृत्वाखालील राष्ट्रवादी काँग्रेसमध्ये प्रवेश करणार असल्याचं राऊत यांनी म्हटलं आहे.

संजय राऊत यांनी आज पत्रकार परिषदेत बोलताना हा खळबळजनक दावा केला. “सुनेत्रा पवार यांच्या गटातील २० ते २२ आमदार शरद पवार यांच्या मूळ राष्ट्रवादीत जाणार असून, त्यांची घरवापसी होणार आहे. तर काही आमदार निवडणुकीपूर्वी इतर पक्षांमध्ये प्रवेश करतील.” असंही राऊत यांनी सांगितलं.

शरद पवारांच्या भेटीसाठी आमदारांकडून वेळ मागितल्याची चर्चा

दरम्यान, राष्ट्रवादी काँग्रेसमधील काही आमदार शरद पवार यांची भेट घेणार असल्याची माहिती समोर आली होती. यासाठी आमदारांनी शरद पवार यांच्याकडे भेटीची वेळ मागितल्याची चर्चा होती. मात्र, आज शरद पवार कोणालाही भेटणार नसल्याची माहिती समोर आली आहे.

शरद पवार सिल्व्हर ओक निवासस्थानीच राहणार

सध्या शरद पवार मुंबईत असून, पुढील काही दिवस ते सिल्व्हर ओक या निवासस्थानी आराम करणार असल्याची माहिती पवार कुटुंबीयांकडून देण्यात आली आहे. त्यामुळे आमदारांच्या भेटीबाबतच्या चर्चांना सध्या तरी पूर्णविराम मिळाला आहे.

राष्ट्रवादीच्या विलीनीकरणाच्या चर्चांना नवं वळण?

एकीकडे दोन्ही राष्ट्रवादी काँग्रेस पक्षांच्या विलीनीकरणाबाबत वेगवेगळे दावे आणि चर्चा सुरू आहेत. तर दुसरीकडे सुनेत्रा पवार यांच्या गटातील आमदार शरद पवारांच्या पक्षात जाणार असल्याचा संजय राऊत यांचा दावा समोर आला आहे. त्यामुळे राष्ट्रवादीच्या दोन्ही गटांमध्ये पडद्यामागे नेमक्या कोणत्या राजकीय घडामोडी सुरू आहेत, याबाबत उत्सुकता वाढली आहे.

मात्र, संजय राऊत यांनी केलेल्या या दाव्याला संबंधित आमदार किंवा राष्ट्रवादी काँग्रेसच्या नेतृत्वाकडून अधिकृत दुजोरा मिळालेला नाही. त्यामुळे या दाव्यावर राष्ट्रवादीचे नेते काय प्रतिक्रिया देतात आणि प्रत्यक्षात कोणत्या राजकीय घडामोडी घडतात, याकडे संपूर्ण राज्याचं लक्ष लागलं आहे.

Kolkata-Sairang Express: आसाममध्ये कोलकाता-सैरंग एक्सप्रेस रुळावरून घसरली ; रेल्वे अपघातात अनेक प्रवासी जखमी