Maharashtra Weather Alert : पावसाने विश्रांती घेतल्यानंतर राज्यातील तापमानात मोठी वाढ झाली असून, नागरिकांना ऑक्टोबर हिटचा तीव्र सामना करावा लागत आहे. वाढत्या तापमानामुळे उकाड्यात मोठी भर पडली असून, येत्या काही दिवसांत पारा आणखी चढण्याची शक्यता भारतीय हवामान विभागाने वर्तवली आहे.

मुंबईसह राज्यातील काही भागांत उष्णतेच्या लाटेचा इशारा देण्यात आला आहे. विशेषतः पश्चिम महाराष्ट्र, विदर्भ आणि मराठवाड्यात उष्णतेची तीव्रता जाणवत आहे. वाढत्या उन्हामुळे नागरिक हैराण झाले असून, पुढील काही दिवस उष्ण आणि दमट हवामान राहण्याची शक्यता आहे.

मुंबई आणि रायगडला यलो अलर्ट

भारतीय हवामान विभागाने मुंबई आणि रायगड जिल्ह्यांसाठी आज उष्णतेच्या लाटेचा यलो अलर्ट जारी केला आहे. तसेच पालघर, ठाणे, मुंबई, रायगड, रत्नागिरी आणि सिंधुदुर्ग या कोकणातील जिल्ह्यांमध्ये उष्ण व दमट हवामान राहण्याचा अंदाज व्यक्त करण्यात आला आहे.

उत्तर महाराष्ट्रात कोरड्या हवामानाचा अंदाज

धुळे, नंदुरबार, जळगाव आणि नाशिक जिल्ह्यांत प्रामुख्याने कोरडे हवामान राहण्याची शक्यता आहे. या भागांतील कमाल तापमानात वाढ होत असून, काही ठिकाणी तापमान ३३ अंश सेल्सिअसच्या आसपास पोहोचण्याचा अंदाज आहे. पुणे, अहिल्यानगर आणि परिसरातही हवामान कोरडे राहण्याची शक्यता वर्तवण्यात आली आहे.

पश्चिम महाराष्ट्रात काही ठिकाणी पावसाच्या सरी

कोल्हापूर, सातारा, सांगली आणि सोलापूर जिल्ह्यांतील काही भागांत हलक्या ते मध्यम स्वरूपाचा पाऊस पडू शकतो. मात्र, या संपूर्ण विभागात सर्वदूर पाऊस पडण्याची शक्यता कमी आहे.

मराठवाड्यात पावसाची शक्यता कमी

छत्रपती संभाजीनगर, जालना, परभणी, बीड, हिंगोली, नांदेड, लातूर आणि धाराशिव या जिल्ह्यांत प्रामुख्याने कोरडे हवामान राहण्याचा अंदाज आहे.

एकीकडे राज्यातील अनेक भागांत तापमानाचा पारा वाढत असताना काही जिल्ह्यांमध्ये तुरळक पावसाची शक्यता आहे. त्यामुळे नागरिकांनी कडक उन्हात बाहेर पडताना आवश्यक ती काळजी घ्यावी आणि हवामान विभागाच्या अधिकृत सूचनांकडे लक्ष द्यावे, असे आवाहन भारतीय हवामान विभागाने केले आहे.

Satara: टँकरच्या फेर्‍यांनी दुष्काळाची धग कमी होईना!