Mahashivratri – महाशिवरात्रीच्या निमित्ताने मावळ तालुक्यातील विविध शिवालयांत पहाटेपासून धार्मिक कार्यक्रमांची रेलचेल पाहायला मिळाली. अभिषेक, रुद्राभिषेक, महापूजा, कीर्तन, भजन, प्रवचन तसेच रात्रजागर अशा विविध धार्मिक कार्यक्रमांचे आयोजन करण्यात आले होते. भाविकांसाठी दर्शन व्यवस्था, पिण्याचे पाणी, प्रसाद वाटप आणि सुव्यवस्थित नियोजन करण्यात आले होते. संपूर्ण तालुक्यात हर हर महादेवच्या जयघोषात भक्तिभावाचे वातावरण निर्माण झाले होते. वारंगवाडी मावळ येथील इंद्रायणी आणि आंद्रायणी नदींच्या संगमावर वसलेल्या संगमेश्वर मंदिरात पहाटेपासून अभिषेक, महापूजा, भजन आणि धार्मिक वाचनाचे आयोजन करण्यात आले होते. पुणे-मुंबई राष्ट्रीय महामार्गालगत असलेल्या घोरावडेश्वर शिवमंदिरात दिवसभर भाविकांची मोठी गर्दी पाहायला मिळाली. कुंडलिका नदीच्या उगमाजवळील कोंडेश्वर महादेव मंदिरातही धार्मिक कार्यक्रम आयोजित करण्यात आले होते. इंद्रायणी आणि कुंडलिका नद्यांच्या संगमावर असलेल्या वाडिवळे परिसरातील संगमेश्वर मंदिरातही भाविकांनी मोठ्या संख्येने उपस्थिती लावत दर्शन घेतले.लोणावळा शहरातील रायवूड परिसरातील शिवमंदिरात शांत आणि भक्तिभावपूर्ण वातावरणात पूजा-अर्चा करण्यात आली. विशेषतः घोरावडेश्वर, वडेश्वर, वारंगवाडी, वडिवळे, लोणावळा आणि वाघेश्वर येथे भक्तांचा महापूर पाहायला मिळाला. महाशिवरात्रीनिमित्त तालुक्यातील अनेक गावांमध्ये यात्रांचे आयोजन करण्यात आले होते. पहाटे महाअभिषेक आणि पूजा संपन्न झाल्यानंतर मंदिर भाविकांसाठी खुले करण्यात आले. मंदिर परिसरात मंडप उभारणी, विद्युत रोषणाई, फुलांच्या माळा आणि आकर्षक रांगोळ्यांनी सजावट करण्यात आली होती. ध्वनीक्षेपकावर शिवकथा, प्रवचन आणि कीर्तन सुरू असल्याने वातावरण अधिक भक्तिमय झाले होते. यावेळी सामाजिक कार्यकर्ते, सेवाभावी संस्था आणि महिला बचतगट यांच्या माध्यमातून भाविकांसाठी प्रसादाचे वाटप करण्यात आले. दर्शनासोबत प्रसाद घेण्यासाठीही भाविकांच्या मोठ्या रांगा लागल्या होत्या. शिवपिंडीवर वाहण्यासाठी बेलपत्र, हार, फुले, पान, कवठ आदी पूजासाहित्यांची दुकाने मंदिर परिसरात उभारण्यात आली होती. प्रशासनाकडून चोख नियोजन भाविकांची वाढती गर्दी लक्षात घेऊन मंदिर विश्वस्तांकडून दर्शनासाठी चोख नियोजन करण्यात आले होते. तसेच आवश्यक ठिकाणी पोलीस बंदोबस्त तैनात करण्यात आला होता. काही मंदिर परिसरात उन्हाचा तडाखा लक्षात घेऊन भाविकांसाठी मंडप आणि पिण्याच्या पाण्याची व्यवस्था करण्यात आली होती. काही ठिकाणी प्रथमोपचार केंद्र आणि वैद्यकीय पथकेही सज्ज ठेवण्यात आली होती. धार्मिक कार्यक्रमांचे आयोजन आणि वाहतूक कोंडी सायंकाळी अनेक मंदिरांमध्ये कीर्तन आणि प्रवचन कार्यक्रमांचे आयोजन करण्यात आले. मोठ्या संख्येने भाविक उपस्थित राहिल्याने काही मंदिर परिसरात वाहतूक कोंडीही पाहायला मिळाली. मात्र भाविकांनी शांततेत आणि भक्तिभावाने दर्शन घेत महाशिवरात्रीचा उत्सव साजरा केला.
