पुणे : म्हाळुंगे-बालेवाडी येथील शिवछत्रपती क्रीडानगरीत सुरू असलेल्या ६३ व्या महाराष्ट्र केसरी स्पर्धेत शनिवारी पुणे जिल्ह्याच्या सागर मारकड याने माती विभागातील ६१ किलो वजनी गटात गतवर्षी सुवर्णपदक पटकाविलेल्या निखील कदमला चितपट करत सुवर्णपदक पटकावलं. सागर मरकड याचे राज्य अजिंक्यपद व महाराष्ट्र केसरी कुस्ती स्पर्धेत सलग पाचवे सुवर्णपदक ठरले. सागरने ५७ किलो गटात चार सुवर्णपदके पटकावली होती, ६१ किलो वजनी गटात त्याचे हे पहिलेच सुवर्णपदक आहे.

अंतिम फेरीत पराभूत निखिल कदम याला रौप्यपदकावर समाधान मानावे लागलं. हनुमंत शिंदे ( सोलापूर) याने कांस्यपदक पटकावलं. हनुमंतने सौरभ राऊतचा पराभव केला.

दरम्यान, ६१ किलो वजनी गटातील माती विभागातील उपांत्य फेरीत सागर मारकडने औरंगाबादच्या सौरभ राऊतला तर निखिल कदमने हनुमंत शिंदेवर मात करीत अंतिम फेरीत धडक मारली होती.