Ladki Bahin Yojana | महाराष्ट्र सरकारद्वारे सुरू करण्यात आलेली लाडकी बहीण योजना सातत्याने चर्चेत आहे. कधी या योजनेतील महिलांना अपात्र ठरवल्याने, तर कधी या योजनेतील रक्कमेतील वाढ करण्यामुळे सातत्याने या योजनेची चर्चा होत आहे.

महिला वर्गात ही योजना लोकप्रिय आहे आणि मतांच्या राजकारणात त्याचा फायदा सत्ताधारी महायुतीला झाल्याचं आपण पाहिलं आहे. महाराष्ट्रातील विधानसभा निवडणुकीत याचा मोठा फायदा झाला असून, या योजनेची रक्कम देखील वाढवण्यात आली आहे.

निवडणुकी दरम्यान सरकारने 2100 रुपये देऊ अशी घोषणा केली होती. दरम्यान, नुकतंच आंतरराष्ट्रीय महिला दिनाचे औचित्य साधत राज्य सरकारने ‘मुख्यमंत्री माझी लाडकी बहीण’ योजनेतील पात्र लाभार्थ्यांना फेब्रुवारी आणि मार्च अशा दोन महिन्याचे एकत्रित तीन हजार रुपयांची मदत देण्याचा निर्णय घेतला आहे.

त्यानुसार येत्या बुधवारपर्यंत (12 मार्च) महिलांच्या बँक खात्यात दोन महिन्यांचे पैसे जमा होणार आहेत, अशी माहिती महिला आणि बालविकासमंत्री आदिती तटकरे यांनी दिली.

लाडकी बहीण योजनेतील सर्व पात्र लाभार्थी भगिनींना फेब्रुवारी आणि मार्च महिन्याचा सन्माननिधी वितरित करण्याची प्रक्रिया शुक्रवारपासून सुरू झाली आहे. ही प्रक्रिया दिनांक 12 मार्च पर्यंत सुरू राहणार आहे.

त्यामुळे सर्व पात्र लाभार्थ्यांच्या बँक खात्यात फेब्रुवारी महिन्याचे 1500 रुपये आणि मार्च महिन्याचे 1500 रुपये असे दोन टप्प्यात एकूण 3000 रुपये जमा करण्याची प्रक्रिया सुरु आहे.

1500 रुपयांऐवजी मिळाले 500 रुपये; लाडक्या बहिणीसोबत घडला अजब प्रकार : 

नाशिकच्या पारेगावमधील महिलेच्या खात्यात फक्त 500 रुपये जमा झाल्याने या महिलेने संताप व्यक्त केला आहेत. मुख्यमंत्री लाडकी बहीण योजना सुरु झाल्यापासून माझ्या खात्यामध्ये 4500 रुपये जमा झाले आहेत.

त्यानंतर सरकारने 2100 रुपये देऊ अशी घोषणा केली. त्यानंतर राज्य सरकारने 1500 रुपये दिले. पण माझ्या खात्यामध्ये फक्त 500 रुपये जमा झाले असल्याचं या महिलेने सांगितलं आहे. सध्या घटनेचे सगळीकडे चर्चा होताना दिसत आहे.