पुणे – राजा रावबहादूर मिल्स येथील “किकी” पबमध्ये फ्रेशर्स पार्टी थांबवून आंदोलन केलेल्या महाराष्ट्र नवनिर्माण विद्यार्थी सेनेने (मनविसे) आता थेट पोलीस आयुक्तालयात हजेरी लावत ‘तो धक्कादायक व्हिडिओ’ दाखवला. या व्हिडिओमध्ये एका पोलीस कर्मचाऱ्याचा पबमध्ये खाकी वर्दीत नाचतानाचा क्षण कैद झाला असून, त्याने प्रशासनालाच चक्रावून टाकले. मनविसेच्या शिष्टमंडळाने आयुक्तांना भेटून पुण्यातील पब-क्लबमधील बेकायदेशीर धंदे, ड्रग्स रॅकेट, रहिवाशांचा त्रास, वाहतूक कोंडी आणि हरवत चाललेली पुण्याची सांस्कृतिक ओळख यावर थेट चर्चा केली. यावेळी पदाधिकाऱ्यांनी पुराव्यांसह अनेक धक्कादायक प्रकार समोर आणले. आयुक्तांचा स्पष्ट इशारा – “युवकांचे भविष्य उद्ध्वस्त करणाऱ्या पब-क्लबविरोधात पोलिस प्रशासन कठोर कारवाई करेल. सामाजिक हितासाठी तुम्ही लढत असताना प्रशासन नेहमीच तुमच्या पाठीशी उभे राहील.” मनविसेचे शहराध्यक्ष धनंजय दळवी यांच्या नेतृत्वाखालील प्रतिनिधीमंडळात प्रशांत कनोजिया, आशिष साबळे, सचिन पवार, अभिषेक थिटे, रुपेश घोलप, विक्रांत भिलारे, हेमंत बोळगे, आशुतोष माने, केतन डोंगरे, संतोष वरे, निलेश जोरी, मयुर शेवाळे, अक्षय पायगुडे यांसह अनेक पदाधिकारी उपस्थित होते.
