Maharashtra Cabinet : राज्यात विधान परिषद निवडणुकांची रणधुमाळी सुरू असतानाच शिवसेना शिंदे गटातून एक महत्त्वाची राजकीय चर्चा समोर आली आहे. मंत्रिमंडळात लवकरच फेरबदल होणार असून पक्षातील काही निष्क्रिय मंत्र्यांची गच्छंती होण्याची शक्यता वर्तवली जात आहे. त्याचवेळी हिंगोलीचे आमदार संतोष बांगर यांना मंत्रिपद मिळण्याच्या चर्चांनाही उधाण आले आहे. (Maharashtra Cabinet)

हिंगोली येथे आयोजित शिवसेनेच्या सभेत खासदार श्रीकांत शिंदे यांनी संतोष बांगर यांच्याबाबत सूचक वक्तव्य केले. “बांगर हे केवळ एका जिल्ह्यापुरते मर्यादित नेते नसून धडाडीचे कार्यकर्ते आहेत. येत्या काळात त्यांच्यावर मोठी जबाबदारी सोपवली जाईल,” असे ते म्हणाले. त्यांच्या या वक्तव्यानंतर बांगर यांच्या मंत्रिमंडळातील संभाव्य प्रवेशाची चर्चा पुन्हा रंगू लागली आहे. (Maharashtra Cabinet)

सभेदरम्यान संतोष बांगर यांच्या समर्थकांनीही त्यांना मंत्रिपद देण्याची मागणी केली. ‘लाल दिवा’ मिळावा, अशी घोषणाबाजी करण्यात आली. यावेळी बांगर यांनीही पक्ष नेतृत्वाकडे मंत्रिमंडळात नव्या चेहऱ्यांना संधी देण्याची मागणी केली. (Maharashtra Cabinet)

आपल्या भाषणात बांगर यांनी पक्षातील काही मंत्र्यांवर अप्रत्यक्ष टीका करताना म्हटले की, “अनेक मंत्री लोकांमध्ये जातात, पण काम करत नाहीत. काहींच्या डोक्यात सत्तेची हवा गेली आहे. फोन केला तरी प्रतिसाद मिळत नाही. अशा मंत्र्यांमुळे पक्ष कमकुवत होत आहे.” (Maharashtra Cabinet)

तसेच, “पक्षात नव्या दमाच्या नेत्यांना संधी दिली पाहिजे. काही मंत्री आता म्हातारे झाले आहेत. त्यांना बाजूला करून आमच्यासारख्या वाघांना पुढे आणा,” असे वक्तव्य करत त्यांनी पक्ष नेतृत्वाला मंत्रिमंडळ विस्ताराचा अप्रत्यक्ष सल्लाही दिला. (Maharashtra Cabinet)

दरम्यान, आरोग्यमंत्री प्रकाश आबिटकर यांचे कौतुक करत बांगर म्हणाले की, “आबिटकर यांना कधीही फोन केला तर ते प्रतिसाद देतात आणि समस्या ऐकून घेतात.”

शिवसेना नेतृत्वाकडून अद्याप मंत्रिमंडळ विस्ताराबाबत कोणतीही अधिकृत घोषणा करण्यात आलेली नसली तरी संतोष बांगर यांच्यावर मोठी जबाबदारी सोपवली जाऊ शकते, असे संकेत पक्षातील वरिष्ठ नेत्यांकडून दिले जात आहेत. त्यामुळे आगामी काळात शिवसेनेच्या मंत्रिमंडळात मोठे बदल होतात का, याकडे राज्याच्या राजकीय वर्तुळाचे लक्ष लागले आहे. (Maharashtra Cabinet)