मुंबई : राज्यातील महायुती सरकारचा मंत्रिमंडळ विस्तार निश्चित झाला आहे. उद्या शनिवारी किंवा रविवारी राजभवनात राज्याचे नवे मंत्री शपथ घेणार असल्याची माहिती सुत्रांनी दिली आहे. याबाबतच्या तयारीला आता वेग आला आहे. सूत्रांनी दिलेल्या माहितीनुसार, राष्ट्रवादीचे 10, शिवसेनेचे 12 आणि भाजपचे 21 मंत्री शपथ घेणार आहेत. त्यामध्ये कॅबिनेट आणि राज्यमंत्रिपदाचा समावेश आहे.

एकनाथ शिंदेंची नाराजी दूर?

महायुती सरकार हे तीन पक्षांनी एकत्र येऊन स्थापन केले आहे. त्यामध्ये राष्ट्रवादी (अजित पवार), शिवसेना (एकनाथ शिंदे) आणि भाजपचा समावेश आहे. मंत्रिमंडळात महत्वाच्या गृह, अर्थ, नगरविकास, महसूल अशा खातेवाटपावर तीन्ही पक्षांकडून दावा करण्यात आला. त्यामुळे सत्तास्थापनेनंतर काही दिवस या महत्वाच्या खात्यांचे वाटप करण्यासाठी तिन्ही पक्षातील नेत्यांच्या बैठका झाल्या. अंतिम निर्णयासाठी दिल्लीत भाजप श्रेष्ठींशीही चर्चा करण्यात आल्यानंतर आता खातेवाटपाचा प्रश्न सुटला असल्याचे सांगितले जात आहे. त्यामुळे उद्याच मंत्रिमंडळ विस्तार होणार असल्याची खात्रीलायक माहिती सूत्रांनी दिली आहे.

एकनाथ शिंदेंच्या नाराजीमुळे मंत्रिमंडळाचा विस्तार पुढे जाईल अशी चर्चा होती. पण आता शनिवारी हा शपथविधी होणार असल्याची माहिती आहे. राजभवनावर त्याची तयारी सुरू आहे. नागपुरातील हिवाळी अधिवेशनापूर्वी मंत्रिमंडळ विस्तार करण्यात येणार असल्याचे मुख्यमंत्री देवेंद्र फडणवीस यांनी स्पष्ट केले होते. मंत्रीपदासाठी निवडलेल्या नावांवर दिल्लीत चर्चा झाली आहे.

शिवसेनेच्या संभाव्य मंत्र्यांची यादी –

शिवसेनेचे 12 मंत्री शपथ घेण्याची शक्यता असून त्यामध्ये 9 कॅबिनेट तर 3 राज्यमंत्री असणार आहेत. अब्दुल सत्तार, तानाजी सावंत आणि संजय राठोड यांच्या नावाला भाजपचा विरोध असल्याची माहिती समोर आली आहे. त्यामुळे या तिघांचा पत्ता कट होणार असल्याची शक्यता आहे. शिवसेनेकडून खालील उदय सामंत, शंभूराजे देसाई, गुलाबराव पाटील, दादा भुसे, प्रताप सरनाईक, संजय शिरसाठ, भरत गोगावले, आशिष जयस्वाल, योगेश कदम, विजय शिवतारे, प्रकाश आबिटकर किंवा राजेंद्र पाटील यड्रावकर हे आमदार मंत्री शपथ घेण्याची शक्यता आहे.

नगरविकास खातं एकनाथ शिंदेंना –

सुरुवातीपासून गृहखाते आणि नगरविकास खात्यासाठी आग्रही असणाऱ्या शिवसेनेला आता नगरविकास खातं देण्यास भाजपची तयारी असल्याची माहिती सूत्रांनी दिली आहे. तर दुसरीकडे अजित पवारांच्या राष्ट्रवादीला 10 मंत्रिपदे देण्यात येणार असून त्यामध्ये 8 कॅबिनेट तर 2 राज्यमंत्रिपदं असणार आहेत.

महायुतीचे तब्बल 230 उमेदवार निवडून आले –

विधानसभा निवडणुकीमध्ये राज्यात महायुतीला स्पष्ट बहुमत मिळाले. महायुतीचे तब्बल 230 उमेदवार निवडून आले. 132 उमेदवारांसह भाजप हा महाराष्ट्रातील सर्वात मोठा पक्ष ठरला. शिवसेना शिंदे गटाला 57 जागा मिळाल्या तर राष्ट्रवादी अजित पवार गटाला 41 जागा मिळाल्या. तर दुसरीकडे महाविकास आघाडील तीनही घटक पक्ष मिळून केवळ 50 जागाच जिंकता आल्या.