भोपाळ : मध्य प्रदेशातील सिधी जिल्ह्यातील रहिवासी गर्भवती महिला लीला साहू यांच्या चांगल्या रस्त्यासाठीच्या मोहिमेला आता यश येत आहे. गावातील जीर्ण रस्त्याच्या दुरुस्तीसाठी बराच काळ आंदोलन करणाऱ्या लीला साहू यांचे सरकार आणि प्रशासनाने ऐकले नाही. मात्र आता चुरहटचे काँग्रेस आमदार अजय सिंह स्वतःच मैदानात उतरले. त्यांनी स्वखर्चाने गावातील रस्त्याचे खडीकाम सुरू केले आहे.

गेल्या अनेक महिन्यांपासून हा रस्ता चर्चेचा विषय आहे. विशेषतः जेव्हा नऊ महिन्यांच्या गर्भवती असताना लीला साहू यांनी रस्त्याच्या वाईट स्थितीबद्दल प्रशासनाचे लक्ष वेधले होते आणि आवाहन केले होते, परंतु सरकारच्या पातळीवर या विषयावर सगळ्यांनीच मौन बाळगले होते. उलट यासंदर्भात स्थानिक खासदार डॉ. राजेश मिश्रा यांचे एक वादग्रस्त विधान समोर आले होते. त्यामुळे या प्रकरणाला आणखी महत्त्व प्राप्त झाले होते.

आमदार अजय सिंह म्हणाले, माझ्या विधानसभा मतदारसंघातील एका रस्त्याबद्दल बरीच चर्चा झाली आहे. लीला साहू आणि त्यांच्या सहकाऱ्यांनी खासदार आणि मंत्र्यांकडे अपील केले होते, परंतु कोणताही उपाय निघाला नाही तेव्हा मी स्वतः माझ्या स्वखर्चाने रस्त्याचे बांधकाम सुरू केले आहे. हे काम आमदार निधीतून नाही तर वैयक्तिक पातळीवर केले जात आहे. जेव्हा सरकार डोळेझाक करते आणि जनतेच्या समस्यांकडे दुर्लक्ष करते, तेव्हा लोकप्रतिनिधीला स्वतःच तोडगा काढावा लागतो असे त्यांनी सोशल मीडियावरच्या पोस्टमध्ये म्हटले आहे.

दरम्यान, गर्भवती लीला साहू म्हणाल्या, आम्ही बऱ्याच काळापासून मागणी केली होती, परंतु सरकार आणि प्रशासनाने आमचे ऐकले नाही. आता आमच्या आमदारांनी स्वतःहून रस्त्याचे खड्डे बुजवण्यास सुरुवात केली आहे. याबद्दल आम्ही त्यांचे आभार मानतो. पावसाळ्यात परिस्थिती आणखी बिकट होते. खड्डे बुजवल्यानंतर आता ग्रामस्थांना दिलासा मिळेल. आम्हाला आशा आहे की लवकरच हा रस्ता पूर्णपणे तयार होईल. लीला साहू यांची ही मोहीम सुमारे एक वर्षापूर्वी सोशल मीडियावरून सुरू झाली. हळूहळू ही चळवळ रस्त्यापर्यंत पोहोचली. एकीकडे रस्ते बांधणीसाठी आवाज उठवताना जनतेने त्यांना पाठिंबा दिला, तर दुसरीकडे काही नेत्यांच्या टिप्पण्यांमुळे वाद निर्माण झाला होता.