Lpg Gas Shortag : अमेरिका-इराण-इस्राइलमध्ये युद्धामुळे देशभरात एलपीजी गॅसचा तुटवडा निर्माण झाला आहे. गॅस सिलिंडर मिळत नसल्यामुळे नागरिक चिंतेत आहेत. गॅस एजन्सीबाहेर गॅस सिलिंडरसाठी नागरिकांच्या रांगा लागत आहेत. अशातच घरगुती वापरासाठीच्या एलपीजी सिलिंडर्समधील गॅसचे प्रमाण कमी करण्यासंदर्भात केंद्र सरकार विचार करत असल्याचे वृत्त आहे. केंद्र सरकारने घरगुती गॅस सिलिंडरच्या वितरणात मोठा महत्वाचा बदल करणार आहे. युद्धामुळे गॅसचा तुटवडा निर्माण झाल्याने हा निर्णय घेण्यात येणार आहे. यापूर्वी घरगुती वापराचा गॅस सिलिंडर १४.२ किलोच्या प्रमाणात नागरिकांना येत होता. मात्र, आता हा घरगुती वापराचा गॅस ८ ते १० किलोच्या प्रमाणात नागरिकांना देण्यात येणार आहे. सिलेंडर तोच राहणार आहे. या प्रस्तावानुसार, मर्यादित साठा अधिक काळ पुरवण्यासाठी आणि एलपीजीचे वितरण जास्तीत जास्त लोकांपर्यंत पोहोचवण्यासाठी सुमारे १० किलो एलपीजी पुरवठा करण्याचा विचार केला जात आहे. कमी वजनाच्या या घरगुती गॅस सिलिंडरची किंमत किती असणार, याबाबत अद्याप स्पष्टता आलेली नाही. जेवढा गॅस असेल तेवढे पैसे आकारले जाणार आहेत. सध्या आपल्याकडे असलेले १४.२ किलोचे सिलेंडर संपल्यानंतर नवीन सिलेंडर ८ ते १० किलोच्या प्रमाणात भरण्यात येणार आहेत. यानंतर तुम्ही बुक केलेला गॅस सिलिंडर कमी वजनाचा असल्याने तो अर्थातच कमी दिवस पुरणार आहेत. त्यामुळे सामान्य घरातील दैनंदिन गणित बिघडणार आहे. या निर्णयावर नागरिकांनी नाराजी व्यक्त केली आहे. आधीच गॅस तुटवडा आहे. त्यात आणखी पाच ते सहा किलो कमी वजनाचा सिलिंडर मिळणार, असल्याचे स्वयंपाक कसा करायचा असा प्रश्न गृहिणींना पडला आहे.
