Loni Kalbhor Crime – लोणी काळभोर पोलीस ठाण्याच्या हद्दीतील एका गावात नातेसंबंधांना काळीमा फासणारी संतापजनक घटना उघडकीस आली आहे. सख्ख्या चुलत्यानेच पुतणीवर वारंवार अत्याचार केल्याचा धक्कादायक प्रकार समोर आला असून या घटनेमुळे परिसरात खळबळ उडाली आहे. या प्रकरणी 22 वर्षीय पीडितेच्या आईने लोणी काळभोर पोलीस ठाण्यात फिर्याद दाखल केली आहे. फिर्यादीच्या तक्रारीवरून पोलिसांनी आरोपी चुलत्याविरुद्ध बलात्कारासह विविध गंभीर कलमान्वये गुन्हा दाखल केला आहे. गुन्हा नोंद होताच पोलिसांनी तातडीने कारवाई करत आरोपीला अटक केली. न्यायालयात हजर केल्यानंतर त्याला सात दिवसांची पोलीस कोठडी सुनावण्यात आली आहे. फिर्यादी महिला घरकाम करून कुटुंबाचा उदरनिर्वाह करतात. त्या एके दिवशी नेहमीपेक्षा लवकर घरी परतल्या असता त्यांना घरात अत्यंत धक्कादायक प्रकार दिसून आला. त्यांच्या दीर त्यांच्या मोठ्या मुलीवर जबरदस्तीने अत्याचार करत असल्याचे त्यांनी पाहिले. यानंतर त्यांनी मुलीला धीर देत विश्वासात घेतले असता, आरोपीने धमकी देत वारंवार अत्याचार केल्याचे समोर आले. भीतीपोटी मुलीने हा प्रकार दीर्घकाळ कुणालाही सांगितला नव्हता. मात्र आईने रंगेहात पकडल्यानंतर हा प्रकार उघडकीस आला. पीडितेच्या आईने तत्काळ लोणी काळभोर पोलीस ठाण्यात धाव घेऊन तक्रार दाखल केली. त्यानुसार पोलिसांनी गुन्हा नोंदवून आरोपीला अटक केली आहे. या घटनेमुळे परिसरात संताप व्यक्त केला जात असून अशा आरोपींना कठोर शिक्षा व्हावी, अशी मागणी नागरिकांकडून होत आहे. पुढील तपास वरिष्ठ पोलीस निरीक्षक राजेंद्र पन्हाळे यांच्या मार्गदर्शनाखाली पोलीस उपनिरीक्षक रुपाली जाधव करीत आहेत.
