Lonand News: लोणंदमध्ये दोन कोटींचा परराज्यातील मद्यसाठा जप्त; मध्यप्रदेशातील चालक अटकेत
Lonand News: सातारा-निरा मार्गावरील लोणंद बसस्थानकासमोर सापळा रचून कारवाई
लोणंद : राज्य उत्पादन शुल्क विभागाच्या भरारी पथकाने लोणंद येथे मोठी कारवाई करत तब्बल दोन कोटी रुपयांहून अधिक किमतीचा परराज्यातील विदेशी मद्यसाठा जप्त केला आहे. याप्रकरणी मध्य प्रदेशातील एका व्यक्तीस अटक करण्यात आली असून आंतरराज्य टोळी कार्यरत असल्याची शक्यता व्यक्त करण्यात येत आहे.
मिळालेल्या माहितीनुसार, राज्य उत्पादन शुल्क विभागाचे विभागीय भरारी पथक, कोल्हापूर आणि भरारी पथक, सातारा यांनी दि. २० जून रोजी सातारा-निरा मार्गावरील लोणंद बसस्थानकासमोर सापळा रचून कारवाई केली.
यावेळी अशोक लेलँड कंपनीचा चौदा चाकी ट्रक (एमएच १२ एमव्ही ४७९९) तपासण्यात आला असता, प्लॅप्स्टिक सिरॅमिकच्या १५० गोण्यांच्या आड मोठ्या प्रमाणात विदेशी मद्य लपवून वाहतूक केली जात असल्याचे उघड झाले.
Monsoon Update: मान्सून पुन्हा सक्रिय होणार; पुढील 3 ते 4 दिवसांत पाऊस बरसण्याचा अंदाज
कारवाईदरम्यान गोवा राज्यात निर्मित व मध्य प्रदेश राज्यात विक्रीस असलेले ‘पोलंड प्राईड व्हिस्की’चे १८० मिली क्षमतेचे ८३४ बॉक्स आणि ‘रॉयल क्लासिक माल्ट व्हिस्की’चे ६७२ बॉक्स असा एकूण १,५०६ बॉक्स मद्यसाठा जप्त करण्यात आला. या मद्याची महाराष्ट्रातील बाजारमूल्य अंदाजे १ कोटी ७१ लाख ४ हजार ३२० रुपये असून ट्रकसह एकूण २ कोटी ९४ हजार ३२० रुपयांचा मुद्देमाल जप्त करण्यात आला.
या प्रकरणी महमंद शफीक रशिद शहा (वय ३९, रा. आसाद नगर, इंदोर, मध्यप्रदेश) यास महाराष्ट्र दारूबंदी कायदा १९४९ अंतर्गत अटक करण्यात आली असून गुन्हा क्रमांक ३०९/२०२६ दाखल करण्यात आला आहे.
आयुक्त डॉ. राजेश देशमुख व सहआयुक्त प्रसाद सुर्वे यांच्या आदेशानुसार, उपआयुक्त विजय चिंचाळकर आणि अधीक्षक बाबासाहेब भुतकर यांच्या मार्गदर्शनाखाली निरीक्षक किरण पवार, निरीक्षक माधव चव्हाण व त्यांच्या पथकाने ही कारवाई केली.
आंतरराज्यीय टोळी कार्यरत असल्याची शक्यता
या गुन्ह्यात महाराष्ट्र शासनाचा मोठ्या प्रमाणात महसूल बुडविण्यात आल्याचे प्राथमिक तपासात समोर आले आहे. तसेच या रॅकेटमध्ये आंतरराज्यीय टोळी कार्यरत असल्याची शक्यता असून दुय्यम निरीक्षक योगेश फटांगरे पुढील तपास करीत आहेत.
अवैध मद्यनिर्मिती, विक्री किंवा वाहतुकीबाबत कोणतीही माहिती असल्यास राज्य उत्पादन शुल्क विभागाच्या टोल फ्री क्रमांकावर संपर्क साधण्याचे आवाहन विभागाने केले आहे.
हेही वाचा:
