Lohagad Murder Case – लोहगड किल्ल्यावरून ढकलून केतन अग्रवाल याचा खून केल्याप्रकरणी अटक करण्यात आलेल्या सिया गोयल आणि तिचा आरोपी प्रियकर चेतन चौधरी यांच्या कटकारस्थानाबाबत पोलिसांनी केलेल्या तपासात नवनवे धक्कादायक तपशील समोर येत आहेत. या दोघांनी पूर्ण माहिती घेत खुनाची व्यूहरचना आखली होती. लोहगड किल्ल्यावर खूनाच्या दिवशी चेतन चौधरी आधीच पोहोचला होता.

किल्ल्यावर प्रवेशासाठी आवश्यक असलेले २५ रुपयांचे तिकीटही त्याने काढलेले नव्हते. किल्ल्याच्या प्रवेशद्वारावरील सुरक्षा रक्षकाने त्याला विचारणा केली असता, मी व्यायामासाठी वर जात आहे, परत येताना तिकीटाचे पैसे देतो, असे सांगून त्याने प्रवेश मिळविला. मात्र त्याने नंतर शुल्क भरले नसल्याचे उघड झाले आहे. स्वतःची अधिकृत नोंदीत राहू नये यासाठी त्याने ही शक्कल लढविली असावी. चेतन याने खूनाचा कट रचताना आपले लोकेशन लपविण्यासाठी विशेष खबरदारी घेतली,

त्याने स्वतःचा मोबाइल इंटरनेट बंद करून दुकानात ठेवला, दुसऱ्या व्यक्तीचा मोबाइल सोबत घेतला होता. किल्ल्यावर जाताना त्याने तोंड झाकलेले, हुडी, सॅक, बर्मुडा, स्पोर्ट्स शूज आणि मोठे हेडफोन घालत ट्रेकिंग किंवा व्यायामासाठी आलेल्या व्यक्तीचा आभास निर्माण करण्याचा त्याचा प्रयत्न असल्याचे पोलिसांचे म्हणणे आहे. गुरूवार दि. १८ जूनला सकाळी साडेआठच्या सुमारास केतन अग्रवाल आणि त्याची वाग्दत्त वधू सिया गोयल मोटारीने लोहगडकडे रवाना झाले.

याची माहिती आधीपासूनच चेतन याला होती, तो त्यांच्याआधीच किल्ल्याच्या प्रवेशद्वाराजवळ जाऊन थांबला होता. केतन आणि सिया किल्ल्यावर चढू लागल्यानंतर चेतन त्यांच्या मागोमाग गेला. याच दरम्यान प्रवेशद्वारावरील सीसीटीव्ही कॅमेऱ्यांनी त्याची स्पष्ट छबी टिपली. हेच फुटेज पोलिसांसाठी महत्त्वाचे धागेदोरे ठरले. किल्ल्यावर निर्जन ठिकाणी संधी साधून सिया आणि चेतन यांनी केतनला दरीत ढकलून दिले.

त्यावेळी घटनास्थळी सुरक्षा रक्षक नव्हेत तसेच इतर पर्यटकांची गदीही नव्हती, त्यामुळे सुरुवातीला हा प्रकार अपघात असल्याचे भासवित सियाने आरडाओरडा करून केतन दरीत पडल्याची माहिती सुरक्षा रक्षकांना दिली. तसेच, तिने तिची आई पूजा गोयल हिलाही फोन करून घटनेची माहिती दिली.

धक्का कोणी दिला : फॉरेंन्सिक तपास सुरू…
केतन याचे वडील विशाल अग्रवाल यांनी पोलिसांना दिलेल्या जबाबानुसार, सिया वारंवार लोहगडावर जाण्याचा आग्रह धरत होती. ३१ मे आणि १४ जूनला दोघे तेथे जाऊन आले होते. अखेर १८ जूनला तिच्याच आग्रहावरून केतन पुन्हा लोहगडावर गेला आणि त्याच दिवशी त्याचा मृत्यू झाला. सध्या, या प्रकरणातील सर्वात महत्त्वाचा प्रश्न म्हणजे केतन याला धक्का नेमका कोणी दिला, सिया की चेतन? याचा फॉरेन्सिक तपास सुरू असून, त्यावरून पुढील पुरावे समोर येण्याची शक्यता आहे.