शिरूर : शिरूर तालुक्यात अवैध धंद्यांविरुद्ध स्थानिक गुन्हे शाखेने मोठी मोहीम हाती घेतली असून, तीन वेगवेगळ्या ठिकाणी धाडी टाकत १२ किलो गांजा आणि ३.५६ लाख किमतीचा गुटखा असा एकूण सुमारे ४.७६ लाखांचा मुद्देमाल जप्त केला आहे. या कारवायांमध्ये चार आरोपींना अटक करण्यात आली असून, पुढील तपासासाठी त्यांना शिरूर पोलीस स्टेशनच्या तपास पथकाकडे सोपवण्यात आले आहे.

पहिली कारवाई : टाकळीहाजी येथे ४ किलो गांजा जप्त

२५ जुलै रोजी स्थानिक गुन्हे शाखेचे सहाय्यक पोलीस निरीक्षक कुलदीप संकपाळ यांच्या नेतृत्वाखालील पथक शिरूर परिसरात गस्त घालत असताना गुप्त बातमीदारामार्फत माहिती मिळाली की, दोन संशयित मोटारसायकलवरून गांजाची विक्रीसाठी आमदाबाद फाट्याकडे येत आहेत. शिरूर पोलीस निरीक्षक संदेश केंजळे यांच्या मार्गदर्शनाखाली मळगंगा लॉन्सजवळ सापळा रचून शुभम शंकर मोहीते (वय २९, रा. टाकळीहाजी) आणि विजय केमराज काळे (वय २९, रा. टाकळीहाजी) यांना ताब्यात घेण्यात आले. त्यांच्याकडून ४ किलो १८५ ग्रॅम गांजा (किंमत ८०,०००) आणि मोटारसायकल जप्त करण्यात आली. या प्रकरणी एन.डी.पी.एस. कायदा १९८५, कलम ८(सी), २०(ब) अंतर्गत शिरूर पोलीस ठाण्यात गुन्हा दाखल करण्यात आला आहे.

दुसरी कारवाई : गुलमोहर अपार्टमेंटमधून गुटखा जप्त

दुसऱ्या कारवाईत शिरूर येथील गुलमोहर अपार्टमेंट, बुरूड आळी येथे रफिक चाँद शेख (वय ३६) याच्या घरावर छापा टाकण्यात आला. यावेळी वेगवेगळ्या कंपन्यांचा ३,५६,७८१ किमतीचा गुटखा, तंबाखू आणि पानमसाला जप्त करण्यात आला. हे पदार्थ मानवी आरोग्यास घातक असल्याने कठोर कारवाई करत रफिक शेख याला अटक करण्यात आली. त्याच्याविरुद्ध बीएनएस कलम १२३, २७४, २७५, २२३ आणि SSAI अधिनियम २००६ चे कलम २६(२)(i), २६(२)(ii), २६(२)(iv) अंतर्गत शिरूर पोलीस ठाण्यात गुन्हा दाखल करण्यात आला आहे.

तिसरी कारवाई : मंगलमूर्ती नगरमधून ८ किलो गांजा जप्त

२६ जुलै २०२५ रोजी स्थानिक गुन्हे शाखेला माहिती मिळाली की, रमेश उर्फ रमन रामभाऊ खराडे (वय ३३, रा. कामाठीपुरा, शिरूर) हा आपल्या घरात गांजा साठवून विक्री करत आहे. मंगलमूर्ती नगर येथे छापा टाकून ८ किलो गांजा (किंमत ₹१,२०,०००) जप्त करण्यात आला. रमेश खराडे याला अटक करून एन.डी.पी.एस. कायद्यांतर्गत शिरूर पोलीस ठाण्यात गुन्हा दाखल करण्यात आला आहे.

या तिन्ही कारवाया पुणे ग्रामीण पोलीस अधीक्षक संदीपसिंह गिल, अप्पर पोलीस अधीक्षक रमेश चोपडे आणि उपविभागीय पोलीस अधिकारी प्रशांत ढोले यांच्या मार्गदर्शनाखाली पार पडल्या. यात पोलीस निरीक्षक संदेश केंजळे, सहाय्यक पोलीस निरीक्षक कुलदीप संकपाळ, दीपक कारंडे, पोलीस कर्मचारी दिलीप पवार, सागर शेळके, तुषार पंदारे, जनार्दन शेळके, संजू जाधव, राजू मोमीन, नाथसाहेब जगताप, नितीन सुदीक, भाग्यश्री जाधव, सागर धुमाळ आणि सचिन भोई यांचा सहभाग होता.

नागरिकांचे कौतुक, पोलिसांची सतर्कता

ही कारवाई स्थानिक गुन्हे शाखेच्या दक्षतेचे आणि पोलिसांच्या सतर्क गस्तीचे उत्कृष्ट उदाहरण ठरली आहे. अवैध धंद्यांविरुद्ध अशा कठोर कारवायांमुळे नागरिकांच्या सुरक्षेला बळ मिळत असून, अशा मोहिमा सातत्याने राबवण्याची मागणी परिसरातील नागरिकांनी केली आहे.