Chandrakant Mandare | Suryakant Mandare – ‘छावा’ चित्रपटात बॉलीवूड अभिनेता विकी कौशलने छत्रपती संभाजी महाराजांची भूमिका साकारली आहे. या चित्रपटातील त्याची भूमिका सर्वांच्या पसंतीस पडली आहे. या चित्रपटातील त्याच्या अभिनयाचे देशभरातून कौतुक केले जात आहे. छावा चित्रपट पाहिल्यानंतर छत्रपती संभाजी महाराजांचा पराक्रम आणि बलिदान पाहून सर्वांच्याच डोळ्यात पाणी आल्याचं दिसून आलं आहे. पण तुम्हाला माहित का? यापूर्वी देखील अनेक मराठी आणि हिंदी कलाकारांनी छत्रपती शिवाजी महाराज आणि छत्रपती संभाजी महाराज यांची व्यक्तीरेखा रुपेरी पडद्यावर साकारली आहे. यामध्ये अभिनेते शंतनू मोघे, अभिनेते डॉ. अमोल कोल्हे, अभिनेते महेश मांजरेकर, अभिनेता चिन्मय मांडलेकर, अभिनेता सुबोध भावे, अभिनेता शरद केळकर आणि अभिनेता गश्मीर महाजनी अश्या अनेक बड्या कलारांचा समावेश असल्याचं दिसून येत. दरम्यान, असं असलं तरी छत्रपती शिवाजी महाराज म्हंटल्यावर सर्वांच्याच नजरेसमोर पहिल्यांदा दोन नाव समोर येतात ती म्हणजे ‘चंद्रकांत मांढरे’ आणि ‘सूर्यकांत मांढरे’. अनेक ब्लॅक अँड व्हाइट सिनेमांमध्ये या दोन्ही कलाकारांनी शिवरायांची भूमिका उत्तमरित्या साकारली आहे. त्यांचा अभिनय, संवाद आणि शरीरयष्टी या सर्वच गोष्टी अतिशय अप्रतिम असल्याचं नेहमीच दिसून आलं आहे. आज देखील अनेक मराठी घरांमध्ये त्यांनी साकारलेल्या भूमिकेतील शिवाजी महाराजांचे फोटो पुजले जातात. ‘चंद्रकांत-सूर्यकांत’ नेमके कोण आहेत? नाट्य, चित्रपट अभिनेते, लेखक, चित्रकार, शिल्पकार, निर्माता, दिग्दर्शक आणि ग्रामीण चित्रपटांतील “गावचा पाटील’ ही भूमिका समर्थपणे वठविणारे ‘सूर्यकांत मांढरे’ यांचा जन्म तानुबाई आणि तुकाराम मांढरे या दांपत्याच्या पोटी कोल्हापूर येथे सन 1925 मध्ये झाला होता. सूर्यकांत यांचे शिक्षण कोल्हापुरातील सरस्वती विद्यालयात आणि हरिहर विद्यालयात पार पडले. तालीम संस्कृतीच्या कोल्हापुरात मांढरे बंधूंना व्यायामाची आवड असणे स्वाभाविकच होते. उंचापुरे, बलदंड असे त्यांचे व्यक्तिमत्त्व होते. थोरले बंधू चंद्रकांत हेसुद्धा अभिनेते म्हणून प्रसिद्ध होते. ‘चंद्रकांत-सूर्यकांत’ ही नावे जोडीनेच घेतली जायची. वयाच्या अवघ्या बाराव्या वर्षी वर्ष 1938 मध्ये त्यांनी सूर्यकांत यांना “ध्रुव’ या चित्रपटात प्रथम संधी मिळाली व त्यांचे रूपेरी पडद्यावर पदार्पण झाले. त्यानंतर वर्ष 1943 मध्ये शिवचरित्रातील गुप्तहेर बहिर्जी यांच्यावर असलेल्या “बहिर्जी नाईक’ या भालजी पेंढारकर दिग्दर्शित चित्रपटात त्यांनी बालशिवाजी महाराजांची भूमिका केली. या चित्रपटाच्या श्रेयनामावलीपासून भालजी पेंढारकरांनी त्यांचे नाव “सूर्यकांत’ ठेवले आणि पुढच्या सगळ्या चित्रपटांत ते “सूर्यकांत’ याच नावाने पडद्यावर दिसू लागले. विविध रंगछटा साकारणारे डॉ. चंद्रकांत मांढरे : कोल्हापूरचे प्रसिध्द मराठी अभिनेते चंद्रकांत मांढरे यांची ओळख म्हणजे एक उत्तम अभिनेते आणि चित्रकार अशी त्यांची ख्याती. आजही कोल्हापुरातील राजारामपुरीत त्यांच्या नावाचे म्युझियम आहे. खरंतरं त्यांचे हे राहते घर होते. पुढे ते वस्तू संग्रहालयात रुपांतरीत करण्यात आले. डॉ. चंद्रकांत मांढरे यांनी अनेक गाजलेल्या मराठी चित्रपटांतून बहरदार सादरीकरण, अभिनय कौशल्य दाखविले. युगे युगे मी वाट पाहिली, पवनाकाठचा धोंडी, थोरातांची कमळा, छत्रपती शिवाजी, संथ वाहते कृष्णामाई, मीठभाकर, सांगत्ये ऐका, मोहित्यांची मंजुळा, धन्य ते संताजी धनाजी, खंडोबाची आण, बनगरवाडी अशा चित्रपटांतून त्यांनी मराठी चित्रपटसृष्टीला अधिक उंचीवर नेले. अनेक चित्रपटांमध्ये विविध व्यक्तीरेखांच्या सर्व रंगछटा त्यांनी साकारल्या. त्यांची चित्रपट सृष्टीतील कारकीर्द अविस्मरणीय आहे. चंद्रकांत यांचा शेवटचा चित्रपट बनगरवाडी होता. त्यावेळी ते 82 वर्षांचे होते. मात्र, शनिवार, दि. 17 फेब्रुवारी 2001 रोजी दुपारी 2 वाजण्याच्या सुमारास घरीच हृदय विकाराच्या झटक्याने त्यांचे निधन झाले. दरम्यान, आज देखील या जोडीचे चित्रपट आणि गाणी मराठी सिनेरसिकांच्या मनात घर करून आहेत.
