Leopard Trapped – खानगाव (ता. जुन्नर) येथे शनिवारी (दि. ७) सकाळी सहाच्या सुमारास एकाच पिंजऱ्यात दोन बिबटे जेरबंद होण्याची दुर्मिळ घटना घडली आहे. येथील आनंद जेजुरकर यांच्या ऊसाच्या शेतात वनविभागाने लावलेल्या पिंजऱ्यात हे दोन्ही बिबटे अडकले. एकाच वेळी दोन बिबटे जेरबंद होण्याची घटना क्वचितच घडते, अशी माहिती जुन्नरचे वनपरिक्षेत्र अधिकारी प्रदीप चव्हाण यांनी दिली आहे. जेरबंद झालेल्या बिबट्यांमध्ये एक नर आणि एक मादी जातीचा असून त्यांचे वय अंदाजे एक ते दीड वर्षे आहे. या घटनेची माहिती मिळताच जुन्नर वनविभागाचे वनपरिमंडळ अधिकारी गवांदे यांनी तातडीने घटनास्थळी धाव घेतली. जेरबंद केलेले दोन्ही बिबटे ताब्यात घेऊन त्यांना पुढील निरीक्षणासाठी माणिकडोह बिबट निवारा केंद्रात रवाना करण्यात आले आहे. हे दोन्ही बिबटे बछडे असल्याने, या परिसरात अजूनही इतर बिबट्यांचा वावर असण्याची शक्यता वनविभागाने वर्तवली आहे. त्यामुळे खबरदारीचा उपाय म्हणून परिसरातील नागरिकांनी सतर्क राहावे आणि एकटे शेतात जाणे टाळावे, अशा सूचना प्रशासनाकडून देण्यात आल्या आहेत. बिबट्यांना निवारा केंद्रात पाठवण्याच्या प्रक्रियेत स्थानिक ग्रामस्थ साईनाथ कामटकर, विजय बोंबले, अभिजित गंजाळे, विशाल गायकवाड, संदेश मंडलिक, मंगेश गाडेकर आणि प्रदीप बोंबले यांनी वनविभागाच्या कर्मचाऱ्यांना मोलाची मदत केली. या भागात बिबट्यांचे दर्शन वारंवार होत असल्याने ग्रामस्थांमध्ये चिंतेचे वातावरण होते, मात्र या दोन बिबट्यांच्या अटकेमुळे काहीसा दिलासा मिळाला आहे.
