आळंदी : खेड तालुक्यातील पिंपळगाव येथे ऊसतोड कामगारावर जीवघेणा हल्ला करणाऱ्या बिबट्या अखेर वनविभागाच्या लावलेल्या पिंजऱ्यात जेरबंद झाला आहे. उपवनसंरक्षक जुन्नर, सहायक वनसंरक्षक जुन्नर आणि वनपरिक्षेत्र अधिकारी चाकण यांच्या मार्गदर्शनाखाली मालकी क्षेत्रात लावण्यात आलेल्या पिंजऱ्यात हा बिबट्या अडकला. या जेरबंद झालेल्या बिबट्याला पुढील तपासणी व उपचारासाठी माणिकडोह येथील बिबट्या निवारा केंद्रात हलविण्यात आले आहे.

पिंपळगाव तर्फे चाकण येथील सरपंच विलासराव नाथू काकडे यांच्या गट नंबर २७ मधील शेतात ऊसतोडणीचे काम सुरू होते. या दरम्यान ऊसतोड करत असलेल्या अंबरसिंह महादू चव्हाण या कामगारावर अचानक बिबट्याने झडप घालून जखमी केले होते. यावेळी इतर ऊसतोड कामगारांनी धाडस दाखवून मोठ्या मोठ्याने आरडाओरडा केल्यामुळे, बिबट्याने जखमी कामगारास सोडून तेथून पळ काढला होता. यानंतर जखमी अंबरसिंह चव्हाण यांना तत्काळ उपचारासाठी आळंदी ग्रामीण रुग्णालयात हलविण्यात आले होते.

दिवसाढवळ्या घडलेल्या या हल्ल्यामुळे परिसरात प्रचंड भीतीचे वातावरण निर्माण झाले होते. भविष्यात आणखी नागरिकांवर किंवा कामगारांवर हल्ला होण्याची शक्यता नाकारता येत नसल्याने, या भागात त्वरित पिंजरा लावून बिबट्याचा बंदोबस्त करावा, अशी आग्रही मागणी सामाजिक कार्यकर्ते पै. बाळासाहेब चौधरी यांनी केली होती. या मागणीची गंभीर दखल घेत वनविभागाने तातडीने शेतात पिंजरा लावला होता, ज्यामध्ये अखेर बिबट्या जेरबंद झाल्याने ग्रामस्थांनी व कामगारांनी सुटकेचा श्वास सोडला आहे.

या मोहिमेत आळंदीचे वनपाल आनंदकुमार इंदलकर, वनरक्षक दिपाली रावते, वनरक्षक नवनाथ पगडे, वनसेवक अजय कोळेकर, धनराज तोंडे, दौलत वाडेकर, किसन पारधी आणि राघू ठाकर यांसह इतर वन कर्मचाऱ्यांनी महत्त्वपूर्ण सहभाग नोंदविला.