Leopard Rescue – जुन्नर तालुक्यातील खामुंडी येथील शेतकरी सुभाष भिमाजी बोडके यांच्या शेतात १ मार्च रोजी सकाळी पावणेसातच्या सुमारास एक बिबट्या जखमी आणि बेशुद्ध अवस्थेत आढळला. ही माहिती मिळताच ओतूर वनपरिक्षेत्राचे कर्मचारी आणि रेस्क्यू टीमने घटनास्थळी धाव घेत बिबट्याला ताब्यात घेतले आहे. याबाबत अधिक माहिती अशी की, शेतात बिबट्या पडल्याचे समजताच वनरक्षक बेले यांनी तातडीने ओतूरचे वनपरिक्षेत्र अधिकारी चैतन्य कांबळे यांना कळवले. त्यानंतर वनपाल, वनरक्षक, आळे-नगदवाडी येथील रेस्क्यू टीम तसेच माणिकडोह बिबट निवारा केंद्राचे डॉक्टर श्रीराम, प्रकल्प अधिकारी महेंद्र ढोरे व कर्मचारी वर्ग घटनास्थळी दाखल झाले. हा बिबट्या मादी जातीचा असून, तिचे वय साधारण दीड वर्ष आहे. डॉक्टरांनी बिबट्याला बेशुद्ध करून पुढील उपचारासाठी माणिकडोह येथील निवारा केंद्रात हलवले आहे. उपचारादरम्यान डॉक्टर श्रीराम यांनी सांगितले की, या बिबट मादीला गेल्या दोन ते तीन दिवसांपासून कोणत्याही प्रकारचे भक्ष न मिळाल्याने अशक्तपणा आला असावा, ज्यामुळे ती बेशुद्ध पडली. सध्या या बिबट मादीवर उपचार सुरू असून, तिच्या प्रकृतीत सुधारणा होत असल्याची माहिती वनविभागाने दिली आहे.
