Leopard Rescue – राजगड तालुक्यातील निघडे येथे शेतातील विहिरीत पडलेल्या बिबट्याला वनविभागाच्या पथकाने धाडसी मोहीम राबवून सुखरूप बाहेर काढले. वनविभागाच्या या तत्पर कारवाईमुळे बिबट्याला जीवदान मिळाले असून, परिसरात काही काळ निर्माण झालेला तणाव निवळला आहे. निघडे येथील शिवाजी बांदल यांच्या शेतातील विहिरीत बिबट्या पडल्याची माहिती मिळताच गावचे पोलीस पाटील जितेंद्र मुजुमले यांनी तालुकास्तरीय आपत्ती व्यवस्थापन गटाला याची माहिती दिली. घटनेचे गांभीर्य ओळखून वनविभागाचे रेस्क्यू पथक तातडीने घटनास्थळी दाखल झाले. वनविभागाच्या पथकाने विहिरीच्या परिस्थितीचा आढावा घेऊन विशेष साधनसामग्रीच्या साहाय्याने बचाव कार्य सुरू केले. काही तासांच्या प्रयत्नांनंतर बिबट्याला सुरक्षितरीत्या बाहेर काढण्यात आले. प्राथमिक तपासणीनंतर पुढील वैद्यकीय उपचारांसाठी या बिबट्याला बावधन येथील वन्यजीव उपचार केंद्रात हलवण्यात आले आहे. ही यशस्वी कारवाई वनक्षेत्रपाल अनिल लांडगे यांच्या मार्गदर्शनाखाली वनपाल दया डोमे, वनरक्षक अभिनंदन सोनकांबळे, विकास निकम, संजू कांबळे, योगेश टिकोळे, स्वप्नील उंबरकर, निखिल रासकर आणि भाग्यश्री जगताप यांच्या पथकाने पूर्ण केली. वन विभागाने दिलेल्या माहितीनुसार सापडलेला बिबट्या वयाने लहान असून परिसरात त्याची आई किंवा इतर बिबटेही असण्याची शक्यता नाकारता येत नाही. त्यामुळे वांगणी, निघडे, कोसगाव आदी परिसरातील नागरिकांमध्ये भीतीचे वातावरण आहे. नागरिकांनी रात्री एकटे फिरणे टाळावे, जनावरे सुरक्षित ठिकाणी बांधावीत तसेच बिबट्या दिसल्यास तात्काळ वन विभागाला माहिती द्यावी, असे आवाहन वन विभागाकडून करण्यात आले आहे.
