Leopard Attack – आंबेगाव तालुक्यातील जारकरवाडी येथे शुक्रवार दि.६ रोजी भर दुपारी शेतात पाणी भरत असताना एका शेतकरी तरुणासमोर अचानक दोन बिबटे उभे राहिल्याची धक्कादायक घटना घडली.जीव वाचवण्यासाठी त्या शेतकऱ्याला जवळच्या झाडावर चढावे लागले.त्याने इतरांना फोन करून मदतीसाठी बोलावल्यानंतर आलेल्या व्यक्तींनी धीर दिल्या मुळे संबंधित शेतकरी झाडावरून खाली उतरला. तसेच बिबट्यानी ही त्यानंतर पळ काढला. जारकरवाडी येथील काकडेवस्ती परिसरात शेतकरी खंडू नाथा लोंढे यांच्या शेतात ठाकर समाजातील रोहित पारधी हा तरुण शेतकरी बाजरीच्या पिकाला पाणी भरत होता.दुपारी साडेबारा वाजण्याच्या सुमारास पाणी भरत असताना त्याला शेजारील उसाच्या शेताच्या बांधावर दोन बिबटे उभे असल्याचे दिसले. अचानक समोर बिबट्याची जोडी दिसल्याने रोहित पारधी घाबरून गेला. स्वतःचा जीव वाचवण्यासाठी त्याने तात्काळ जवळ असलेल्या लिंबाच्या झाडावर चढून आसरा घेतला.काही वेळ बिबटे त्याच्याकडे पाहत उभे राहिल्याने त्याची भीती अधिकच वाढली.दरम्यान रोहित पारधी यांनी मोबाईलद्वारे शेतमालक खंडू लोंढे यांना संपर्क करून घटनेची माहिती दिली. माहिती मिळताच खंडू लोंढे हे हातात काठी घेत मोठ्याने आवाज करत शेताच्या दिशेने धावले. त्यांनी इतर शेतकऱ्यांनाही याबाबत माहिती दिली.शेतकरी घटनास्थळी पोहोचताच काही वेळाने बिबटे उसाच्या शेतात निघून गेले. त्यानंतर रोहित पारधी हा झाडावरून खाली उतरला. जारकरवाडी परिसरात यापूर्वीही बिबट्याचा वावर असल्याचे स्थानिकांनी सांगितले आहे.मात्र भर दिवसा बिबट्याचे दर्शन झाल्याने शेतकरी आणि नागरिकांमध्ये भीतीचे वातावरण निर्माण झाले आहे.वन विभागाने या घटनेची तात्काळ दखल घेऊन परिसरात पिंजरा बसवावा, अशी मागणी स्थानिक ग्रामस्थांनी केली आहे. “मी शेतात बाजरीच्या पिकाला पाणी भरत होतो. अचानक उसाच्या शेताच्या बांधावर दोन बिबटे उभे दिसले. घाबरून मी लगेच जवळच्या लिंबाच्या झाडावर चढलो. काही वेळ ते तिथेच उभे होते.” – रोहित पारधी,शेतकरी. “रोहितचा फोन आल्यानंतर मी लगेच शेतात आलो. मोठ्याने आवाज करत इतर शेतकऱ्यांनाही बोलावले. काही वेळाने बिबटे उसात गेले. वन विभागाने तातडीने पिंजरा लावावा.” – खंडू लोंढे,शेतकरी, जारकरवाडी. जारकरवाडी परिसरात दिवसाढवळ्या बिबट्याचे दर्शन झाल्याने नागरिकांमध्ये भीतीचे वातावरण आहे. वन विभागाने तातडीने उपाययोजना कराव्यात,अन्यथा शेती कामांवर परिणाम होण्याची शक्यता आहे. – रमेश लबडे, उद्योजक, जारकरवाडी.
