सध्या राज्याचे पावसाळी अधिवेशन सुरु आहे. या अधिवेशनासाठी जाणाऱ्या काही आमदारांनाही मुंबईतील मुसळधार पावसाचा फटका बसला आहे. मुंबईतील मुसळधार पावासामुळे रेल्वे ट्रॅकवर पाणी साचले आहे. त्यामुळे हावडा एक्सप्रेस ही बऱ्याच काळापासून कुर्ला परिसरात अडकली आहे.

या एक्सप्रेसने कॅबिनेट मंत्री अनिल पाटील, संजय गायकवाड, अमोल मिटकरी, जोगेंद्र कवाडे यांसह अनेक आमदार प्रवास करत होते. मात्र अजित पवार गटाचे आमदार अमोल मिटकरी आणि मदत पुनर्वसन मंत्री अनिल पाटील रेल्वे ट्रॅकवरुन चालत निघाले. त्यानंतर पुढे उभी असलेली ट्रेन गाठली आणि त्यानंतर ते अधिवेशनात पोहचले.

यावेळी आमदार अमोल मिटकरी यांचा एक व्हिडिओ समोर आला आहे. ज्यात ते सांगतात की, “दादर आणि कुर्ला स्थानकामध्ये राज्याचे मदत आणि पुर्नवसन तसेच आपत्ती व्यवस्थापन मंत्री अनिल पाटील, मी आणि आणखी या ट्रेनमध्ये सात ते आठ आमदार अडकून आहेत. पावसामुळे जनजीवन विस्कळीत झाले आहे.”

“आज विधीमंडळ अधिवेशनचा अंतिम आठवडा सुरु आहे. त्या अधिवेशनात जाण्यासाठीही प्रचंड हाल सहन करावे लागत आहेत. लवकरच वाहतूक सेवा सुरळीत होईल, अशी अपेक्षा करतो. याचा सर्वसामान्य लोकांनाही फटका बसला आहे,” असे अमोल मिटकरी म्हणाले. आमदार संजय गायकवाड, हसन मुश्रीफ यांना देखील मुंबईतील या पावसाचा फटका सहन करावा लागला.

विधिमंडळाच्या कामकाजावर परिणाम होण्याची शक्यता

दरम्यान,  मुंबईतील अतिवृष्टीमुळे विधिमंडळाच्या कामकाजावर परिणाम होण्याची शक्यता आहे. अतिवृष्टीमुळे आमदार व मंत्री पोहचले नसल्यास कामकाज काही वेळेसाठी स्थगित केले जाण्याची शक्यता असल्याचे सांगितले जात आहे. याबाबत विधानसभा अध्यक्ष परिस्थितीचा आढावा घेऊन निर्णय घेण्याची शक्यता आहे.

हेही वाचा: 

मुख्यमंत्री नितीश कुमारांना त्यांचा उत्तराधिकारी सापडला ? ; ‘या’ मोठ्या अधिकाऱ्याच्या पक्ष प्रवेशामुळे चर्चांना उधाण