नवी दिल्ली – धृपद आचार्य पंडित लक्ष्मण भट्ट तैलंग यांना यावर्षी पद्मश्री पुरस्कार जाहीर झाला आहे. मात्र पद्मश्री पुरस्कार मिळण्यापूर्वीच त्यांचे वयाच्या ९३ व्या वर्षी निधन झाले. जयपूर येथील संतोकबा दुर्लभजी मेमोरियल हॉस्पिटल येथे शनिवारी सकाळी ११ वाजता त्यांनी अखेरचा श्वास घेतला.

२६ जानेवारीच्या पूर्वसंध्येला पद्मश्री पुरस्कार जाहीर करण्यात आला. त्यामध्ये राजस्थानमधील चौघांचा समावेश होता. कलेच्या क्षेत्रात जयपूरचे पंडित लक्ष्मण भट्ट तैलंग, बिकानेरचे मंड गायक अली मोहम्मद-गनी मोहम्मद, भिलवाडा येथील जानकी लाल तसेच समाजसेवेच्या क्षेत्रात माया टंडन यांची यासाठी निवड करण्यात आली आहे.

पुरस्कार जाहीर झाल्या दिवसापासूनच लक्ष्मण तैलंग यांची प्रकृती ठीक नव्हती, त्यामुळे त्यांना रुग्णालयात दाखल करण्यात आले होते. मात्र आज 16 व्या दिवशी उपचारादरम्यान त्यांचा मृत्यू झाला.

लक्ष्मण भट्ट तैलंग हे धृपद गायनाचे उत्तम कलाकार होते. धृपद गायन हे अत्यंत अवघड गायन मानले जाते. यात साहित्य आणि संगीत यांचा अतिशय सुंदर संगम आहे. हे मुक्त संगीत नाही, तर त्यात काही साहित्यिक आणि गायनाचे नियम आहेत आणि त्यात हे गाणे गायले आहे. वयाच्या ९३ व्या वर्षीही लक्ष्मण भट्ट नव्या पिढीला धृपद गायन शिकवत होते.