Lakhewadi farm fire – लाखेवाडी (ता. शिरूर) परिसरात एका अज्ञात व्यक्तीने फळबागेला जाणीवपूर्वक आग लावल्याची घटना उघडकीस आली आहे. या भीषण आगीत सुमारे १ लाख १० हजार रुपयांचे नुकसान झाले असून, ७० चिंचेची झाडे पूर्णपणे जळून खाक झाली आहेत. याप्रकरणी शिरूर पोलीस ठाण्यात गुन्हा दाखल करण्यात आला आहे.

मिळालेली माहिती अशी की, लाखेवाडी येथील शुभम भगतसिंग दंडवते यांच्या गट नं. ६३२ मधील जमिनीवर ही घटना २४ एप्रिल रोजी सकाळी नऊच्या सुमारास घडली. अज्ञात व्यक्तीने लावलेल्या या आगीत ७० चिंचेची झाडे पूर्णपणे जळाली, तर ३० चिंचेची आणि १० आंब्याची झाडे अंशतः जळून नुकसान झाले आहे. उन्हाळ्याच्या दिवसात मोठ्या कष्टाने जोपासलेली झाडे डोळ्यादेखत जळाल्याने दंडवते कुटुंबीयांचे मोठे आर्थिक नुकसान झाले आहे.

या कृत्यामुळे परिसरात भीतीचे वातावरण असून, शेती व फळबागांचे जाणीवपूर्वक नुकसान करणाऱ्या समाजकंटकांवर कठोर कारवाई करण्याची मागणी नागरिकांनी केली आहे. शिरूर पोलिसांनी या घटनेची गांभीर्याने दखल घेत अज्ञाताविरुद्ध गुन्हा नोंदवला आहे. या प्रकरणाचा पुढील तपास पोलीस हवालदार शरद वारे करत आहेत. पोलिसांनी घटनास्थळाचा पंचनामा करून तपास सुरू केला आहे.