Ladki Bahin Yojana : राज्यभरातील ‘मुख्यमंत्री माझी लाडकी बहीण‘ योजनेच्या (Ladki Bahin Yojana) लाभार्थी महिलांसाठी अत्यंत आनंदाची आणि दिलासादायक बातमी समोर आली आहे. मे महिन्याच्या हप्त्याची चातकासारखी वाट पाहणाऱ्या पात्र महिलांच्या खात्यात येत्या १२ ते १५ जून दरम्यान योजनेचे पैसे जमा केले जाणार आहेत.

भाजप आमदार मोनिका राजळे यांनी सोशल मीडिया पोस्टच्या माध्यमातून ही महत्त्वाची आणि अधिकृत माहिती (Ladki Bahin Yojana) शेअर केली आहे. या थकीत हप्त्यासाठी राज्य शासनाकडून तब्बल ३४४ कोटी रुपयांचा भरीव निधी मंजूर करण्यात आला असून, यामुळे महिलांमधील प्रतीक्षेला आता पूर्णविराम मिळणार आहे.

शेवगाव-पाथर्डी विधानसभा मतदारसंघाच्या भाजप आमदार मोनिका राजळे यांनी यासंदर्भात सोशल मीडियावर पोस्ट करत लाभार्थी महिलांच्या खात्यात मे महिन्याचा १५०० रुपयांचा हप्ता लवकरच वर्ग होणार असल्याचे स्पष्ट केले.

राजळे यांनी दिलेल्या माहितीनुसार, येत्या १२ ते १५ जून या कालावधीत थेट बँक खात्यात (DBT) ही रक्कम जमा होण्याची दाट शक्यता आहे. राज्याच्या सामाजिक न्याय विभागाने महिला व बालविकास विभागाला मे महिन्याचा हप्ता वितरित (Ladki Bahin Yojana) करण्यासाठी ३४४ कोटी रुपयांच्या निधीला मंजुरी दिली असून, या संदर्भातील अधिकृत शासन निर्णय (GR) १० जून रोजी जारी करण्यात आला आहे.

आमदार मोनिका राजळे यांच्या या घोषणेमुळे राज्यातील लाखो लाभार्थी महिलांमध्ये आनंदाचे वातावरण आहे. यापूर्वी मे महिन्याचा हप्ता वेळेवर जमा न झाल्यामुळे अनेक महिलांनी चिंता आणि संभ्रम व्यक्त केला होता. मात्र आता शासनाकडून थेट निधी मंजूर झाल्याने आणि संभाव्य तारखा समोर आल्यामुळे महिलांना मोठा दिलासा मिळाला आहे.

दरम्यान, ज्या महिला कोणत्या कारणास्तव अपात्र ठरल्या आहेत, त्यांना या योजनेचा लाभ घेता येणार नाही आणि त्यांच्या खात्यात मे महिन्याचा कोणताही हप्ता जमा होणार नाही, हे देखील स्पष्ट करण्यात आले आहे. त्यामुळे आता अवघ्या दोन-तीन दिवसांतच पात्र बहिणींच्या बँक खात्यात पैशांची पहिली देवाणघेवाण सुरू होणार असून, संपूर्ण राज्याचे लक्ष आता शासनाच्या या पुढील प्रक्रियेकडे लागले आहे.