Supriya Sule | Ravi Rana । Ladki Bahin Yojana । बडनेरा विधानसभा मतदारसंघाचे आमदार रवी राणा यांनी लाडकी बहीण योजनेवरुन केलेल्या वक्तव्यावरून एक वाद निर्माण झाला आहे. रवी राणा यांनी आमच्या सरकारला आशीर्वाद नाही दिले तर त्यांच्या खात्यातून 1500 परत घेणार असल्याचं म्हटलं होतं. त्यांच्या या वक्तव्याची राजकीय वर्तुळात चर्चा रंगली होती. त्यांच्या या वक्तव्यावरून विरोधकांनी टीका करण्यास सुरुवात केली आहे. आता राष्ट्रवादी काँग्रेस पार्टी शरदचंद्र पवार पक्षाच्या खासदार सुप्रिया सुळे यांनी रवी राणा यांना कडक शब्दांत इशारा दिला आहे. सध्या शरद पवार गटाकडून ‘शिवस्वराज्य यात्रे’चा शुभारंभ करण्यात आला आहे. आज ही यात्रा धाराशिव येथे दाखल झाली असून, या सभेत खासदार सुप्रिया सुळे यांनी रवी राणा यांच्यावर हल्लाबोल केला. सुप्रिया सुळे म्हणाल्या की, “माझी विनंती आहे. तू एका बहिणीचे पैसे परत घेऊन दाखव. मी चॅलेंज करते की, तुम्ही पैसे घेऊन दाखवा. मग बघा मी काय करते. डिसेंबरमध्ये लाडकी बहीणच्या लिस्टची स्क्रूटीनी होणार हे कोणाला माहिती होते का हो? मला तर ते माहिती नव्हते. मग यांना कसे कळले?”, असे प्रश्न सुप्रिया सुळे यांनी उपस्थित केले. “महाविकास आघाडीचे सरकार आल्यावर घरी येऊन पैसे देईन. मतदान आणि स्कीमचा काहीही संबंध नाही. भाऊ बहिणीच्या नात्याला पंधराशे रुपयांची किंमत लावली आहे. मी भावाने मागितले असते तर पक्ष आणि चिन्ह सगळं देऊन टाकलं असतं. वर जाताना काय घेऊन जाणार? ‘खाली हाथ आए थे, खाली हाथ जाएंगे’. असं देखील त्या यावेळी म्हणाल्या. काय म्हणाले होते रवी राणा? आमचं सरकार पुन्हा सत्तेत आल्यावर लाडकी बहीण योजनेचे 1500 रुपये हे आम्ही दुप्पट म्हणजे 3 हजार रुपये करू. आता त्यासाठी मला तुमचा आशीर्वाद हवा आहे. मात्र ज्यांनी मला आशीर्वाद दिला नाही तर मी तुमचा भाऊ म्हणून ते 1500 रुपये तुमच्या खात्यातून परत घेणार, असं रवी राणा म्हणाले होते. त्यांच्या या वक्तवव्याची राजकीय वर्तुळात चर्चा रंगली होती. तू 1500 रुपये परत घेऊन दाखवच… ; सुप्रिया सुळेंनी रवी राणांना दिला दम
