Ladki Bahin Yojana : मुख्यमंत्री माझी लाडकी बहीण योजनेच्या लाभार्थी महिलांना ऑक्टोबर महिन्याचे १,५०० रुपये कधी मिळणार, याची प्रतीक्षा लागली आहे. नोव्हेंबर महिन्यात सरकारने सप्टेंबर महिन्याचा हप्ता महिलांच्या बँक खात्यात जमा केला. आता ऑक्टोबरचा हप्ता कधी मिळणार, याबाबत महत्त्वाची माहिती समोर आली आहे.

या योजनेअंतर्गत पात्र महिलांना दरमहा १,५०० रुपयांची आर्थिक मदत दिली जाते. राज्यातील लाखो महिला या योजनेचा लाभ घेत आहेत. त्यामुळे प्रत्येक महिन्याचा हप्ता वेळेवर मिळावा, अशी लाभार्थी महिलांची अपेक्षा आहे.

सप्टेंबर महिन्याचे १५०० रुपये मिळाले

दिवाळी आणि भाऊबीजेच्या पार्श्वभूमीवर लाडक्या बहिणींना दोन महिन्यांचे मिळून ३,००० रुपये एकत्र मिळतील, अशी अपेक्षा व्यक्त केली जात होती. सप्टेंबर आणि ऑक्टोबर या दोन्ही महिन्यांचे पैसे दिवाळीपूर्वी द्यावेत, अशी मागणीही करण्यात आली होती.

मात्र, सरकारने दिवाळीपूर्वी सप्टेंबर महिन्याचे १,५०० रुपयेच महिलांच्या खात्यात जमा केले. त्यामुळे आता ऑक्टोबर महिन्याच्या हप्त्याची प्रतीक्षा सुरू आहे.

२५ नोव्हेंबरपर्यंत पैसे मिळण्याची शक्यता?

ऑक्टोबर महिन्याचे पैसे कधी मिळणार, याबाबत आता चर्चा सुरू झाली आहे. आगामी मंत्रिमंडळ बैठकीत राज्य सरकारने हप्ता वितरित करण्याचा निर्णय घेतल्यास २५ नोव्हेंबरपर्यंत महिलांच्या खात्यात १,५०० रुपये जमा होऊ शकतात.

मात्र, २५ नोव्हेंबर ही सरकारने अधिकृतपणे जाहीर केलेली तारीख नाही. त्यामुळे महिलांनी अधिकृत घोषणेची प्रतीक्षा करावी. सरकारच्या निर्णयानंतरच पैसे जमा होण्याबाबत स्पष्टता येणार आहे.

ऑक्टोबर आणि नोव्हेंबरचे मिळून ३ हजार रुपये मिळणार?

दरम्यान, दिवाळीपूर्वी दोन महिन्यांचे पैसे एकत्र मिळाले नसल्याने आता आणखी एक प्रश्न उपस्थित होत आहे. नोव्हेंबर महिन्यात ऑक्टोबरचा हप्ता जमा झाला नाही, तर डिसेंबरमध्ये ऑक्टोबर आणि नोव्हेंबर या दोन्ही महिन्यांचे मिळून ३,००० रुपये दिले जाणार का, अशी चर्चा सुरू आहे.

मात्र, राज्य सरकारने याबाबत अद्याप कोणताही अधिकृत निर्णय जाहीर केलेला नाही. त्यामुळे लाडक्या बहिणींना पुढील हप्ता नेमका कधी मिळणार आणि दोन महिन्यांचे पैसे एकत्र मिळणार का, हे सरकारच्या आगामी निर्णयानंतरच स्पष्ट होणार आहे.