Krystle Dsouza : टीव्ही अभिनेत्री क्रिस्टल डिसूझा सध्या एका वेगळ्याच कारणामुळे चर्चेत आली आहे. क्रिस्टलला तिच्या गाडीवर एक संशयास्पद पत्र मिळालं असून याचसंदर्भातील व्हिडीओ तिने चाहत्यांसमोर आणला आहे. तिच्या कारवर एक धमकीचे पत्र सापडले आहे, जे पाहून तिला मोठा धक्का बसला आहे.

या पत्राद्वारे कोणीतरी तिच्यासोबत मस्करी करत आहे किंवा तिला धमकावण्याचा प्रयत्न करत आहे. ‘तुझं सत्य लवकरच समोर येईल’, असं या पत्रात लिहिलेलं आहे. हे पत्र वाचून घाबरलेल्या क्रिस्टलने सोशल मीडियावर व्हिडीओ पोस्ट केला आहे. या पत्रावर तिचे नाव लिहिलेले आहे आणि ते कारवर कोणी चिकटवले हे  तिलाही माहित नाही. त्यामुळे तिने व्हिडिओ शेअर करत आपला राग व्यक्त केला आहे.

“….लवकरच तुझे सत्य सर्वांसमोर येईल”

व्हिडिओमध्ये क्रिस्टल म्हणते, “मी आताच कामावरून मोकळी झाले असून पार्किंग एरियामध्ये आले आहे. ही माझी कार आणि या कारच्या विंडशील्डवर मला हे दिसले.” हे सांगत क्रिस्टल ते पत्र उचलते आणि वाचू लागते. या पत्रात लिहिले आहे, “क्रिस्टल, आज जितके हसायचे आहे तितके हसून घे, लवकरच तुझे सत्य सर्वांसमोर येईल.”

हे पत्र वाचल्यानंतर क्रिस्टल म्हणाली, “साधारणपणे अशा गोष्टींमुळे मी त्रस्त होत नाही, पण यावर माझे नाव लिहिले आहे. त्यामुळे ही कोणतीही सहज घडलेली गोष्ट नाही हे मी मानू शकते. आता मला समजत नाहीये की मी घाबरू की काळजी करू. जर हा काही विनोद असेल, तर हा अत्यंत वाईट विनोद आहे. मला काय करावे हेच सुचत नाहीये.”

क्रिस्टल डिसूझाचा हा व्हिडिओ सोशल मीडियावर प्रचंड व्हायरल होत असून प्रत्येक जण तिची काळजी व्यक्त करत आहे. क्रिस्टलच्या या व्हिडीओ नेटकऱ्यांचं लक्ष वेधून घेतलं आहे. चाहत्यांनी तिला काळजी घेण्याचं आवाहन केलं आहे. मात्र, आतापर्यंत क्रिस्टलने या नोटविरोधात कोणतेही कायदेशीर पाऊल उचललेले नाही. तिने सध्या केवळ व्हिडिओ शेअर केला आहे.

दरम्यान, क्रिस्टल ही प्रसिद्ध टीव्ही अभिनेत्री आहे. ती लवकरच ‘द ट्रेटर्स 2’ या शोमध्ये सहभागी होणार असल्याची माहिती समोर आली होती. त्यामुळे हा एक प्रमोशनल व्हिडीओ असू शकतो, असेही म्हटलं जात आहे.

हेही वाचा: 

Kishori Pednekar : “ती घाणेरडी नटी तिच्यावर…” ; कंगना रणौतवर किशोरी पेडणेकर संतापल्या