Kritika Kamra and Gaurav Kapur Wedding : अभिनेत्री कृतिका कामरा सध्या तिच्या वैयक्तिक आयुष्यामुळे चर्चेत आली आहे. ती ‘ब्रेकफास्ट विथ चॅम्पियन्स’ फेम क्रिकेट समालोचक गौरव कपूर याला डेट करत असल्याचं म्हटलं जात असून दोघांच्याही लग्नाच्या चर्चा रंगल्या आहेत. हे दोघेही ११ मार्च २०२६ रोजी गौरवच्या मुंबईतील घरी एका अत्यंत खासगी सोहळ्यात, कुटुंबियांच्या उपस्थितीत नोंदणी पद्धतीने लग्न करणार आहेत. त्यानंतर दोघांच्या लग्नाचा रिसेप्शन सोहळा होईल. कृतिका कामरा व गौरव कपूर यांचे रिसेप्शन १२ मार्च रोजी होणार असल्याची चर्चा आहे. लग्न व रिसेप्शनमध्ये अवाढव्य खर्च न करता तो साधेपणाने करायचा निर्णय कृतिका व गौरवने घेतला आहे. या सोहळ्याला चित्रपट इंडस्ट्री आणि क्रिकेट जगतातील त्यांचे मित्र, कुटुंबीय आणि सहकारी उपस्थित राहण्याची शक्यता आहे. गौरवच्या मुंबईतील निवासस्थानी अत्यंत खासगी स्वरूपात हा नोंदणीकृत विवाह पार पडणार आहे. या सोहळ्याला केवळ दोन्ही कुटुंबातील सदस्य आणि मोजकेच जवळचे मित्र उपस्थित राहणार आहेत. दोघांनाही आपले लग्न दिखाऊपणापेक्षा अर्थपूर्ण आणि वैयक्तिक ठेवायचं असल्याने त्यांना हा निर्णय घेतला आहे.दरम्यान, ३७ वर्षांच्या कृतिका कामराने डिसेंबर महिन्यात गौरवबरोबरचे फोटो शेअर करून प्रेमाची कबुली दिली होती. ४४ वर्षांचा गौरव कपूर घटस्फोटित आहे. त्याचं पहिलं लग्न अभिनेत्री आणि मॉडेल किरत भट्टलशी झालं होतं. काही वर्षे डेट केल्यानंतर त्यांनी २०१४ साली लग्न केलं होतं. २०२१ मध्ये त्यांचा घटस्फोट झाला. तर, कृतिका कामरा काही वर्षांपूर्वी करण कुंद्राबरोबर रिलेशनशिपमध्ये होती. २०१२ मध्ये त्यांचे ब्रेकअप झाले. कृतिकाने २००७ मध्ये ‘यहाँ के हम सिकंदर’ मधून अभिनय सुरू केला. तिने ‘कितनी मोहब्बत है’, ‘प्यार का बंधन’, ‘कितनी मोहब्बत है २’ आणि ‘कुछ तो लोग कहेंगे’ यांसारख्या मालिकांमध्ये काम केले. २०१८ मध्ये ‘मित्रों’ या चित्रपटातून तिने बॉलीवूडमध्ये पदार्पण केलं. त्यानंतर तिने अनेक चित्रपटांमध्ये काम केले. हेही वाचा: Revati Lele Wedding : अभिनेत्री रेवती लेले अडकली विवाहबंधनात; पारंपरिक लुकने वेधले साऱ्यांचे लक्ष
