कोल्हापूर : कोल्हापुरात खासदार धनंजय महाडिक याचे चिरंजीव कृष्णराज महाडिक यांनी कोल्हापूर महापालिकेच्या निवडणुकीत भाजपकडून उमेदवारी अर्ज दाखल केला होता. मात्र, (28 डिसेंबर) दुसऱ्याच दिवशी कृष्णराज यांनी निवडणुकीतुन माघार घेणार असल्याची घोषणा केली आहे. पक्षाचा आदेश आणि महायुतीतील कार्यकर्त्यांना संधी मिळावी यासाठी आपण माघार घेत असल्याचे ते म्हणाले. भाजपने अधिकृत उमेदवारांची यादी जाहीर करण्याआधीच त्यांनी अर्ज दाखल केला होता. मात्र त्यांनी आज निवडणुकीच्या रिंगणातून माघार घेतली आहे. कृष्णराज महाडिक म्हणाले, भाजप ही अत्यंत शिस्तबद्ध संघटना आहे. पक्षाचा आदेश शिरसावंद्य मानून या पक्षातील कार्यकर्ते काम करत असतात. त्यानुसार पक्षीय पातळीवर झालेल्या निर्णयाचा आदर राखत, मी कोल्हापूर महानगरपालिकेची निवडणूक लढवणार नाही, असे जाहीर करत आहे. महापालिकेची निवडणूक महायुती एकत्र लढवणार आहे. अशावेळी इच्छुक कार्यकर्त्यांची संख्या मोठी आहे. त्यापैकी आणि कोणालाही निवडणूक लढवण्याची संधी मिळावी, या विचारातून मी महापालिका निवडणूकीतून माघार घेत आहे.
