प्रभात वृत्तसेवा शिक्रापूर – कोरेगाव भीमा (ता. शिरूर) येथे एका 19 वर्षीय युवतीने राहत्या घरात गळफास घेऊन आत्महत्या केल्याची दुर्दैवी घटना घडली. या घटनेने परिसरात खळबळ उडाली आहे.अनुष्का गणेश वाघमोडे (वय 19, सध्या रा. कोरेगाव भीमा, मूळ रा. आष्टी, ता. मोहोळ) असे या युवतीचे नाव आहे. ती अल-अमीन कॉलेजसमोर संजय सोनवणे यांच्या मालकीच्या खोलीत राहात होती. अनुष्काचे वडील गावी गेले असल्याने ती एकटीच खोलीत होती. दुपारच्या सुमारास तिची मैत्रीण भेटण्यासाठी आली असता दरवाजा आतून बंद असल्याने तिने खोली मालक संजय सोनवणे यांना माहिती दिली. त्यांनी तत्काळ पोलिसांना कळविले. पोलिस हवालदार हनुमंत गिरमकर यांनी घटनास्थळी येऊन दरवाजा उघडून पाहणी केली असता, अनुष्काने साडीच्या सहाय्याने गळफास घेतल्याचे दिसून आले. या घटनेत अनुष्काचा मृत्यू झाला असून शिक्रापूर पोलीस ठाण्यात साधना राजेश माने (वय 42, रा. कोरेगाव भीमा) यांनी दिलेल्या माहितीवरून आकस्मात मृत्यूची नोंद करण्यात आली आहे.
