Ncp leade : राष्ट्रवादी काँग्रेस अजित पवार गटातील नेते किरण एकनाथ शिंदे यांच्यावर दिवसाढवळ्या धारदार शस्त्राने प्राणघातक हल्ला झाल्याची धक्कादायक घटना समोर आली आहे. धुळे जिल्ह्यातील कुसुंबा येथे ही घटना घडली असून यामुळे राजकीय वर्तुळात खळबळ उडाली आहे. मिळालेल्या माहितीनुसार, किरण शिंदे हे आपल्या सहकाऱ्यांसोबत गोताणे येथे एका साखरपुड्याच्या कार्यक्रमासाठी गेले होते. यावेळी काही अज्ञात व्यक्तींनी त्यांच्यावर अचानक हल्ला केला. या गोंधळात एका व्यक्तीने पाठीमागून धारदार शस्त्राने शिंदे यांच्यावर वार करण्याचा प्रयत्न केला. मात्र, त्यांच्या सहकाऱ्यांनी तत्काळ प्रसंगावधान दाखवत हस्तक्षेप केल्यामुळे मोठा अनर्थ टळला. या हल्ल्यामागे पूर्वीचे वैमनस्य कारणीभूत असल्याचा संशय व्यक्त केला जात आहे. या प्रकरणी किरण शिंदे यांनी धुळे तालुका पोलीस ठाण्यात तक्रार दाखल केली असून संबंधितांवर कठोर कारवाई करण्याची मागणी केली आहे. पोलीस या घटनेचा पुढील तपास करत आहेत. दरम्यान, दुसरीकडे जळगाव शहरातही राजकीय वादातून हाणामारीची घटना घडली. शहरातील शनी पेठ पोलीस ठाण्यात भाजपचे माजी नगरसेवक कैलास सोनवणे यांच्या गटाचा काही युवकांसोबत वाद झाला. या वादाचे रूपांतर पोलीस ठाण्यातच हाणामारीत झाले. वाल्मिक नगर परिसरातील वादाची तक्रार देण्यासाठी माजी नगरसेवक आपल्या काही कार्यकर्त्यांसह पोलीस ठाण्यात गेले होते. त्यावेळी दोन्ही गट आमनेसामने आले आणि गुन्हे शोध पथकाच्या खोलीतच जोरदार हाणामारी झाली. या वादामागे आगामी महापालिका निवडणुकीची पार्श्वभूमी असल्याची चर्चा शहरात सुरू आहे.
