कॅनबेरा – ब्रिटनचे राजे चार्ल्स यांच्या ऑस्ट्रेलियन संसदेच्या भेटीदरम्यान स्थानिक सिनेटर लिडिया थॉर्प यांनी वसाहतविरोधी घोषणा दिल्या, त्यामुळे उपस्थित खासदार आणि इतर मान्यवर स्तब्ध झाले.

७५ वर्षीय चार्ल्स यांच्या भाषणानंतर थॉर्प जवळजवळ एक मिनिट आम्हाला आमची जमीन परत द्या! तुम्ही आमच्याकडून जे चोरले आहे ते आम्हाला द्या अशा घोषणा थॉर्प यांनी दिल्या.

ही तुमची जमीन नाही, तुम्ही माझे राजे नाही, असेही अपक्ष खासदार असलेल्या थार्प चार्ल्स यांना उद्देशून म्हणाल्या. त्यांनी युरोपियन स्थलांतरितांकडून स्थानिक ऑस्ट्रेलियन लोकांच्या नरसंहाराचा निषेध केला.

ऑस्ट्रेलिया ही १०० वर्षांहून अधिक काळ ब्रिटीशांची वसाहत होती, ज्या दरम्यान हजारो आदिवासी ऑस्ट्रेलियन मारले गेले आणि संपूर्ण समुदाय विस्थापित झाला. 1901 मध्ये देशाला वास्तविक स्वातंत्र्य मिळाले, परंतु ते कधीही पूर्ण प्रजासत्ताक बनले नाही.

चार्ल्स ऑस्ट्रेलिया आणि सामोआच्या दौऱ्यावर असताना हा प्रकार घडला आहे. त्यांना कर्करोगाचे निदान झाल्यानंतरचा त्यांचा पहिला मोठा विदेश दौरा आहे.

दरम्यान, थॉर्प या लक्ष वेधून घेणारे राजकीय स्टंट आणि राजेशाहीला तीव्र विरोध यासाठी ओळखल्या जातात. २०२२ मध्ये जेव्हा त्यांनी पदाची शपथ घेतली तेव्हा, थॉर्प यांनी उजव्या हाताची मुठ वर केली आणि अनिच्छेने राणी एलिझाबेथ द्वितीय यांची सेवा करण्याची शपथ घेतली. त्या वेळेस त्या ऑस्ट्रेलियाच्या प्रमुख होत्या.