Kia : CNG कार खरेदी करण्याचा विचार करणाऱ्या ग्राहकांसाठी Kia ने दोन नवीन पर्याय बाजारात आणले आहेत. कंपनीने भारतात Carens आणि Carens Clavis या 7-सीटर MPVच्या फॅक्टरी-फिटेड CNG आवृत्त्या लॉन्च केल्या आहेत. या कारची सुरुवातीची एक्स-शोरूम किंमत अनुक्रमे ₹12.12 लाख आणि ₹12.39 लाख आहे.

कोणत्या व्हेरिएंटची किती किंमत?

Carens CNG फक्त Premium (O) व्हेरिएंटमध्ये उपलब्ध आहे. त्याची किंमत ₹12.12 लाख आहे. तर Carens Clavis CNG HTE आणि HTE (O) या दोन व्हेरिएंटमध्ये मिळते. त्यांची किंमत अनुक्रमे ₹12.39 लाख आणि ₹13.35 लाख आहे.

दोन्ही CNG मॉडेल्सची किंमत संबंधित पेट्रोल-मॅन्युअल मॉडेलपेक्षा सुमारे ₹1 लाख अधिक आहे. या श्रेणीत Maruti Ertiga CNG, Toyota Rumion CNG आणि Maruti XL6 CNG यांच्याशी त्यांची स्पर्धा होणार आहे.

1.5 लिटर इंजिन, 96 एचपी पॉवर –

दोन्ही कारमध्ये 1.5 लिटर Smartstream नैसर्गिकरित्या एस्पिरेटेड पेट्रोल इंजिन देण्यात आले आहे. CNGवर हे इंजिन 96 एचपी पॉवर आणि 123 एनएम टॉर्क तयार करते. CNG मॉडेलमध्ये फक्त 6-स्पीड मॅन्युअल गिअरबॉक्स देण्यात आला आहे. पेट्रोल मॉडेलमध्ये उपलब्ध iMT आणि DCT पर्याय CNG आवृत्तीत नाहीत.

Kia ने अद्याप या कारचे अधिकृत मायलेज जाहीर केलेले नाही. CNG प्रणालीसोबत 60 लिटर क्षमतेची टाकी देण्यात आली आहे. तसेच 4.2 इंचांच्या रंगीत TFT डिस्प्लेवर CNGमधील अंदाजे किती अंतर कापता येईल, याची माहिती मिळते.

बूट स्पेस कमी होणार –

CNG टाकी बूटच्या खाली बसवण्यात आली आहे. त्यामुळे तिन्ही सीटच्या रांगा वापरल्यास बूट स्पेस 216 लिटरवरून 116 लिटर होते. मात्र, स्पेअर व्हील कारच्या खाली पूर्वीप्रमाणेच देण्यात आले आहे.

CNG टाकीमुळे वाढणारे वजन लक्षात घेऊन Kia ने सस्पेंशनमध्ये बदल केले आहेत. फ्रंट डिस्क ब्रेकमध्येही सुधारणा करण्यात आली असून R16 व्हील्स देण्यात आले आहेत. CNGनुसार इंजिनचे कॅलिब्रेशनही करण्यात आले आहे.

या बदलांव्यतिरिक्त CNG मॉडेलमधील बहुतांश फीचर्स पेट्रोल मॉडेलप्रमाणेच आहेत. या लॉन्चमुळे Kia देखील 7-सीटर MPVमध्ये फॅक्टरी-फिटेड CNG पर्याय देणाऱ्या कंपन्यांच्या यादीत सामील झाली आहे.