Khopoli News – खोपोली नगरपरिषदेकडून बांधकाम परवानगी घेताना शुल्क न भरता बनावट पावत्या सादर करून नगरपरिषदेची फसवणूक केल्याप्रकरणी चार बिल्डरांवर कारवाई करण्यात आली आहे. या प्रकरणी संबंधित बिल्डरच्या बांधकाम परवानग्या रद्द करण्यात आल्या आहेत. यासंबंधी खोपोली पोलीस ठाण्यात तक्रार दाखल करण्यात आली आहे, अशी माहिती खोपोली नगरपरिषदेचे मुख्याधिकारी डॉ. पंकज पाटील यांनी दिली. नगरपरिषदेच्या नगररचना विभागाच्या तपासात सन २०२२ ते २०२३ या कालावधीत हा प्रकार घडल्याचे उघड झाले. संबंधित बिल्डरांनी बांधकाम परवानगीसाठी आवश्यक असलेले शुल्क पूर्णपणे न भरता काही रक्कम ऑनलाइन व काही रोख भरल्याचे दाखवून त्याच्या बनावट पावत्या प्रशासनाकडे सादर केल्याचे आढळून आले. या प्रकरणाची शंका आल्यानंतर नगररचना विभागाने संबंधित बिल्डरांकडून आवश्यक कागदपत्रे व माहिती मागवली होती. मात्र ती समाधानकारकपणे सादर करण्यात न आल्याने तसेच सादर केलेल्या पावत्या बनावट असल्याचे स्पष्ट झाल्यानंतर नगरपरिषद प्रशासनाने त्यांच्या बांधकाम परवानग्या रद्द केल्या. तसेच पुढील कारवाईसाठी खोपोली पोलीस ठाण्यात तक्रार दाखल करण्यात आली आहे. या प्रकरणाचा अधिक तपास पोलीस करत आहेत. दरम्यान, परवानगी रद्द झाल्याचे पत्र मिळाल्यानंतर संबंधित बिल्डरांनी खोपोली पोलीस ठाण्यात जाऊन आपण सर्व शुल्क भरले असून आमची फसवणूक झाल्याची तक्रार दिली आहे. या चार बिल्डरांपैकी एक खोपोलीतील नामांकित विकासक असून दुसऱ्या बिल्डराचा नातेवाईक विद्यमान नगरसेवक असल्याचे सांगितले जात आहे. तसेच एक जण अग्रगण्य शिक्षण संस्थेचा संचालक तर एक जण बाजारपेठेतील व्यापारी असल्याची माहिती मिळत आहे.
