Khed Panchayat Samiti – खेड पंचायत समितीच्या सभापतीपदी शिवसेना (उबाठा) पक्षाच्या विद्या मोहिते यांची, तर उपसभापतीपदी मंगेश सावंत यांची निवड झाली आहे. पीठासन अधिकारी तथा उपविभागीय अधिकारी अनिल दौंडे यांच्या नेतृत्वाखाली सोमवारी (दि. ९) पार पडलेल्या अटीतटीच्या निवडणुकीत शिवसेनेने राष्ट्रवादी काँग्रेसच्या उमेदवारांचा पराभव करत सत्ता हस्तगत केली. या निवडीनंतर शिवसेना कार्यकर्त्यांनी गुलालाची उधळण करत जल्लोष केला. निवडणूक प्रक्रियेत सभापती पदासाठी विद्या मोहिते यांना ९ मते मिळाली, तर त्यांच्या प्रतिस्पर्धी राष्ट्रवादी काँग्रेसच्या अश्विनी तरस यांना ७ मतांवर समाधान मानावे लागले. उपसभापती पदासाठी मंगेश सावंत यांनी ९ मते मिळवून राष्ट्रवादीचे निखिल थोरवे यांचा पराभव केला. या निवडणुकीत सर्व १६ सदस्य उपस्थित होते. निवडणूक निर्णय अधिकारी अनिल दौंडे यांनी निकाल जाहीर केल्यानंतर, सहाय्यक निवडणूक निर्णय अधिकारी रवींद्र मोरे आणि गटविकास अधिकारी विशाल शिंदे यांनी प्रक्रियेची पूर्तता केली. निवडीदरम्यान पोलीस निरीक्षक सुभाष चव्हाण यांच्या मार्गदर्शनाखाली चोख बंदोबस्त ठेवण्यात आला होता. निवडीनंतर आमदार बाबाजी काळे यांच्या हस्ते नवनिर्वाचित पदाधिकाऱ्यांचा सत्कार करण्यात आला. यावेळी जिल्हा परिषद सदस्य ॲड. विजयसिंह शिंदे, विजया शिंदे, शिवाजी वर्पे, रामदास धनवटे आणि युवा सेनेचे मृण्मय काळे यांच्यासह मोठ्या संख्येने शिवसैनिक उपस्थित होते. नवनिर्वाचित सभापती विद्या मोहिते यांनी सांगितले की, सरपंच पदापासून सुरू झालेला हा प्रवास आता सभापती पदापर्यंत पोहोचला असून, आमदार काळे यांच्या मार्गदर्शनाखाली तालुक्यातील सर्वसामान्य नागरिकांचे प्रश्न सोडवण्यासाठी आपण कटिबद्ध राहणार आहोत.
