Khed News – महसूल मंत्री चंद्रशेखर बावनकुळे यांच्या संकल्पनेतून शासकीय योजना सर्वसामान्य जनतेपर्यंत पोहोचविण्यासाठी राबविण्यात येणारे छत्रपती शिवाजी महाराज राजस्व समाधान शिबीर प्रभावी ठरणार असल्याचे मत आमदार बाबाजी काळे यांनी व्यक्त केले. महसूल विभागाच्या वतीने कनेरसर (ता. खेड) येथे मंडलस्तरीय छत्रपती शिवाजी महाराज राजस्व समाधान शिबीर उत्साहात पार पडले. शिबिराचे उद्घाटन खेडचे आमदार बाबाजी काळे यांच्या हस्ते करण्यात आले. यावेळी खेडचे तहसीलदार प्रशांत बेडसे, बाजार समितीचे सभापती व जिल्हा परिषद सदस्य अॅड. विजयसिंह शिंदे, जिल्हा परिषद सदस्या दीप्ती भोगाडे, खेडचे उपअधीक्षक भू-अभिलेख नितीन सूर्यवंशी, सामाजिक कार्यकर्ते अशोकराव टाव्हरे, नायब तहसीलदार चेतन मोरे, राम बीजे, रविंद्र मोरे, खेडचे गटविकास अधिकारी विशाल शिंदे, उत्तमराव गोगावले, दिलीपराव माशेरे, बाळासाहेब खरपुडे, जयंतराव दौंडकर, सुरेखा टाव्हरे, अमित खरपुडे, संतोष गार्डी, दिलीपराव चौधरी यांच्यासह कनेरसर मंडलातील पंधरा गावांतील नागरिक, लाभार्थी व विद्यार्थी मोठ्या संख्येने उपस्थित होते. सभापती अॅड. विजयसिंह शिंदे यांनी महसूल विभागाच्या कार्याचे कौतुक करून नागरिकांनी शासनाच्या योजनांचा लाभ घ्यावा, असे आवाहन केले. तहसीलदार प्रशांत बेडसे यांनी तालुक्यातील नागरिकांना शासनाच्या विविध योजनांचा लाभ मिळावा यासाठी मंडलस्तरीय शिबिरे आयोजित करून सुविधा उपलब्ध करून देण्यास प्रशासन कटिबद्ध असल्याचे सांगितले. जिल्हा परिषद सदस्या दीप्ती भोगाडे यांनी एकल महिला तसेच समाजातील सर्व घटकांसाठी महसूल विभाग करत असलेले प्रयत्न उल्लेखनीय असल्याचे नमूद केले. कार्यक्रमाचे प्रास्ताविक नायब तहसीलदार चेतन मोरे यांनी केले. सूत्रसंचालन सुदाम कराळे यांनी केले, तर आभार मंडल अधिकारी निलेश घोडके यांनी मानले.
