Khawaja Asif : पाकिस्तानने इस्रायलबरोबरचे संबंध सामान्य करण्यासाठी अब्राहम करारामध्ये सामील व्हावे, असे आपल्याला वाटत नसल्याचे पाकिस्तानचे संरक्षण मंत्री ख्वाजा आसिफ (Khawaja Asif) यांनी म्हटले आहे. अमेरिकेचे अध्यक्ष डोनाल्ड ट्रम्प यांनी केलेल्या आवाहनानंतर आसिफ यांनी ही प्रतिक्रिया दिली आहे.

आपल्या मूलभूत विचारधारेशी विसंगत असलेल्या कोणत्याही करारात आपण सामील होऊ नये, असे आपले वैयक्तिक मत आहे, असे आसिफ (Khawaja Asif) एका वृत्तवाहिनीला दिलेल्या मुलाखती दरम्यान म्हणाले.

पूर्व जेरुसलेमला राजधानी बनवून १९६७ पूर्वीच्या सीमेवर पॅलेस्टिनी राज्य स्थापन होईपर्यंत इस्रायलला स्वीकारायचे नाही, ही आपल्या देशाची दीर्घकालीन भूमिका आहे.

त्यामुळे अब्राहम करारात सामील होणे आम्हाला मान्य नाही, ही आमची अगदी स्पष्ट भूमिका आहे, असेही ते म्हणाले. पाकिस्तानचा पासपोर्ट इस्रायलमध्ये प्रवास करण्यासाठी वैध नाही, याचा स्पष्ट उल्लेख पासपोर्टवर केला गेल्याचेही त्यांनी नमूद केले.

आसिफ यांचासह (Khawaja Asif) पाकिस्तानमधील इतर अनेक राजकारण्यांचा ज्यू राष्ट्र असलेल्या इस्रायलसोबत संबंध सामान्य करण्याच्या कोणत्याही कल्पनेला तीव्र विरोध आहे. गेल्या महिन्यात, त्यांनी इस्रायलवर त्या प्रदेशात नरसंहार केल्याचा आरोप करत, इस्रायलला मानवतेवरील शाप म्हटले होते.