प्रभात वृत्तसेवा
खंडाळा – खंडाळा पंचायत समितीच्या सहा गणांची आरक्षण सोडत तहसील कार्यालयात सोमवारी काढण्यात आली. या सोडतीसाठी अनेक इच्छुकांनी देव पाण्यात ठेवले होते; परंतु सोडतीनंतर तालुक्यात ‘कही खुशी, कही गम’ अशी अवस्था झाली आहे. यामध्ये शिरवळ व पळशी या गणांमध्ये सर्वसाधारण महिलेला संधी मिळणार असून, नायगाव व बावडा गणांमध्ये सर्वसाधारण आरक्षण पडले आहे. खेड गणात नागरिकांचा मागास प्रवर्ग महिला आणि भादे गणात अनुसूचित जाती महिला आरक्षण पडले आहे. या सोडतीमुळे अनेक इच्छुकांच्या दांड्या गुल झाल्या आहेत, तर अनेकांना संधी चालून आली आहे.

उपजिल्हाधिकारी (भूसंपादन) तथा निवडणूक नियंत्रण अधिकारी राजश्री मोरे यांच्या अध्यक्षतेखाली आणि तहसीलदार अजित पाटील, नायब तहसीलदार स्वप्निल खोल्लम, हेमंत कामत व महसूल कर्मचार्‍यांच्या उपस्थितीत आरक्षण सोडत झाली. या सोडतीवेळी उदय कबुले, अजय भोसले, भूषण शिंदे, अतुल पवार, हर्षवर्धन भोसले व नेतेमंडळी मोठ्या संख्येने उपस्थित होती.

खेड गटात सर्वाधिक चुरस..
खेड जिल्हा परिषद गटात भाजपकडून ऋषीकेश धायगुडे यांचे नाव एकमताने समोर येत असले, तरी राष्ट्रवादी अजित पवार गटाकडून गणेश धायगुडे, मनोज पवार, नितीन ओहाळ यांची नावे पुढे येत आहेत. सध्याच्या राजकीय स्थितीचा विचार करता या गटाची निवडणूक तालुक्यात सर्वाधिक अटीतटीची होण्याची शक्यता वर्तवली जात आहे.

‘तुतारी’ची भूमिका गुलदस्त्यात..
लोकसभा व विधानसभा निवडणुकीत खंडाळा तालुक्यात ‘तुतारी’चा गट चांगलाच निर्माण झाला होता; परंतु जिल्हा परिषद व पंचायत समिती निवडणुकांमध्ये हा गट थंडावल्याची चर्चा आहे. त्यामुळे राष्ट्रवादी शरद पवार पक्षातील कोणाला उमेदवारी देण्यात येणार की, साटेलोटे करून इतरांचा खेळखंडोबा करणार, या चर्चेला उधाण आले आहे.