Khalapur News – उन्हाळी सुट्टीनंतर सोमवारी (दि. १५) सर्व शाळा पुन्हा विद्यार्थ्यांच्या गजबजाटाने फुलून गेल्या. नवीन दप्तर, वह्या, पुस्तके, गणवेश, पाण्याच्या बाटल्या आणि डबा घेऊन विद्यार्थी आनंदाने शाळेत दाखल झाले. अनेक पालकांनी आपल्या मुलांना स्वतः शाळेत सोडत त्यांच्या शैक्षणिक प्रवासाची सुरुवात केली. विशेषतः पहिल्यांदाच शाळेत आलेल्या बालवाडी आणि नर्सरीतील विद्यार्थ्यांच्या चेहऱ्यावर उत्सुकतेबरोबरच थोडी भीतीही दिसून आली. विद्यार्थ्यांचा पहिला दिवस संस्मरणीय करण्यासाठी तालुक्यातील अनेक शाळांनी स्वागताचे आयोजन केले होते.

काही ठिकाणी विद्यार्थ्यांचे फुलांनी स्वागत करण्यात आले, तर चॉकलेट्स, शैक्षणिक साहित्य आणि इतर उपयुक्त वस्तूंचे वाटप करून त्यांचे स्वागत करण्यात आले. दीड-दोन महिन्यांच्या सुट्टीनंतर पुन्हा शाळेत परतलेल्या विद्यार्थ्यांमध्ये मित्र-मैत्रिणींना भेटण्याचा उत्साह दिसून आला. मात्र, सकाळची झोप पूर्ण न झाल्याने काही विद्यार्थी डोळे चोळत किंवा पालकांच्या खांद्यावर डोके ठेवून शाळेकडे जाताना दिसले. नवीन वर्गशिक्षक कोण असतील, आपल्या शेजारी कोण बसणार, कोणत्या विषयाला कोण शिक्षक असतील, अशा अनेक प्रश्नांची उत्सुकता त्यांच्या मनात होती.

शिक्षकांनीही नव्या उमेदीने विद्यार्थ्यांचे स्वागत करत शिक्षणाच्या नव्या पर्वाची सुरुवात केली. शिपाई आणि कर्मचाऱ्यांनी विद्यार्थ्यांचे हसतमुखाने स्वागत केले. शाळेच्या पहिल्या दिवसाने केवळ विद्यार्थ्यांनाच नव्हे, तर पालकांनाही त्यांच्या बालपणीच्या आठवणींमध्ये रमण्याची संधी दिली. खालापूरात नव्या शैक्षणिक वर्षाची सुरुवात उत्साह, आनंद आणि सकारात्मक वातावरणात झाल्याचे चित्र सर्वत्र पाहायला मिळाले.