Pune : केतन अग्रवाल यांचे आजोबा देवीचंद अग्रवाल (वय ७१) यांचे शनिवारी सायंकाळी पुण्यातील एका खासगी रुग्णालयात उपचारादरम्यान निधन झाले. केतन अग्रवाल हत्याप्रकरणाचा तपास सुरू असतानाच त्यांच्या निधनामुळे अग्रवाल कुटुंबावर पुन्हा शोककळा पसरली आहे. मागील दोन दिवसांपासून त्यांच्यावर उपचार सुरू होते.

केतन अग्रवाल याच्या मृत्यूने अग्रवाल कुटुंबावर दुःखाचा डोंगर कोसळला होता. या प्रकरणाचा तपास सुरू झाल्यानंतर केतनला न्याय मिळावा आणि दोषींवर कठोर कारवाई व्हावी, यासाठी देवीचंद अग्रवाल यांनी सातत्याने भूमिका मांडली. गेल्याच आठवड्यात पुण्यात आयोजित करण्यात आलेल्या कँडल मार्चमध्येही त्यांनी सहभाग घेतला होता. यावेळी त्यांनी यात जबाबदार असलेल्या प्रत्येक व्यक्तीची पोलिसांनी सखोल चौकशी करावी, अशी मागणी त्यांनी केली होती.

त्यांच्या पश्चात दोन मुले, सुना असा परिवार आहे. केतन अग्रवाल हत्याप्रकरणाने राज्यभरात मोठी खळबळ उडाली असून या प्रकरणाचा तपास सुरू आहे. अशा परिस्थितीत आपल्या नातवासाठी न्यायाची लढाई लढणारे देवीचंद अग्रवाल यांचे निधन झाल्याने अग्रवाल कुटुंबावर पुन्हा एकदा शोककळा पसरली आहे.

दरम्यान, पुण्यातील केतन अग्रवाल (26) यांचा 18 जून 2026 रोजी लोहगड किल्ल्यावरून खोल दरीत पडून मृत्यू झाला. सुरुवातीला हा अपघात असल्याचे सांगण्यात आले होते. मात्र, कुटुंबीयांनी संशय व्यक्त केल्यानंतर पोलिस तपासात हे पूर्वनियोजित हत्याकांड असल्याचा दावा करण्यात आला.

पोलिसांनी केतनची मंगेतर सिया गोयल आणि तिचा कथित प्रियकर चेतन चौधरी यांना अटक केली. सीसीटीव्ही, मोबाईल लोकेशन, कॉल रेकॉर्ड, चॅट्स आणि इतर डिजिटल पुराव्यांच्या आधारे तपास सुरू आहे. दररोज वेगवेगळे खुलासे या प्रकरणात समोर येत आहेत.